بەڕێوەبەری گشتیی بازرگانیی هەرێم رایگه‌یاند: به‌غدا بڕی سێزده ملیار دیناری بۆ جووتیارانی هەرێمی کوردستان خه‌رج ده‌كات.
نەوزاد شێخ کامل بەڕێوەبەری گشتیی بازرگانیی هەرێمی کوردستان رایگه‌یاند: وەزارەتی بازرگانیی عێراق، بری دووسه‌د و شه‌ست و یه‌ك ملیار دیناری وەک شایستەی دارایی جووتیارانی عێراق راگەیاند و له‌و بره‌ش سێزده ملیار دیناری بۆ جووتیارانی هەرێمی کوردستان دەبێت.
نەوزاد شێخ کامل تایبه‌ت بۆ كوردستان تیڤی رایگه‌یاند: هەفتەی داهاتوو ئەو بڕە پارەیە دەخەنە سەر ئەژمارە بانکییەکان و کۆی گشتیی پارەی قۆناغی رابردوو کە قۆناغی حەوتەمی شایستە داراییەکانی جووتیارانی هەرێمی کوردستان بوو بۆ ساڵی دووهه‌زار و بیست، بیست و دوو ملیار و دووسه‌د و شه‌ست ملیۆن دینار بوو.
گوتیشی: بۆ هەولێر هه‌شت ملیار و په‌نجا و شه‌ش ملیۆن دینار و بۆ سلێمانی حه‌فت ملیار و سه‌د و حه‌فتا و شه‌ش ملیۆن دینار و بۆ دهۆک حه‌فت ملیار و بیست و هه‌شت ملیۆن دینار.
جێی ئاماژه‌یه حکومەتی عێراق پێنجسه‌د و په‌نجا و حه‌فت ملیار دینار پارەی جووتیارانی هەرێمی کوردستانی بۆ ساڵەکانی دووهه‌زار و چوارده و دووهه‌زار و پازده و دووهه‌زار و شازده خەرج نەکردووە، بەڵام دوای هەوڵێکی زۆر وەزارەتی بازرگانیی عێراق بڕیاری دا، دووسه‌د و شه‌ست و هه‌شت ملیار دینار بنێرێت .
کۆمێنت (0)
تا ئێستا هیچ کۆمێنتێک نەکراوە.