سالیادا دامەزراندنا کۆمارا کوردستان ل دھۆکێ ھاتە ساخکرن

 سالیادا کۆمارا کوردستان (مھاباد) ئەڤرۆ رۆژا 21/1/2021 ب ئامادەبوونا (د.عەلی تەتەر) پارێزگارێ دھۆکێ و لایەنێن سیاسی و دامودەزگەھێن حکومی و کەسایەتیێن دەڤەرێ ژ لایێ رێڤەبەریا گشتی یا رەوشەنبیری و ھونەری ل دھۆکێ ب ھەماھەنگی ل گەل دەزگایێ پاراستنا ئالایێ کوردستانێ ڤە ل ھۆلا سەنتەرێ پێشمەرگە یێ رەوشەنبیری ل باژێرێ دھۆکێ ھاتە ساخکرن ، د ھەمان دەم دا قەشەک ھاتە خەلاتکرن. د. عەلی تەتەر، پارێزگارێ دھۆکێ د پەیڤەکێ دا دیار کر کو کۆمارا کوردستان ل رۆژا 21/1/1946 هاتیە دامەزراندن و ئەڤ رۆژە رۆژەکا نەمرە د دیرۆکا کوردستانێ دا و ئێک ژوان دەستکەفتایە کو ئەم هەمی کورد شانازیێ پێ دکەین، چونکو ئیرادا گەلێ کورد بۆ کۆمارا کوردستانێ چێکری و گۆت : بتنێ ئەو کەس بهایێ ئازادیێ دزانن یێن کو هاتینە داگیرکرن، هەروەسا ب دامەزراندنا ڤێ کۆمارێ دیاربوو کو کورد ژی دشێن ببنە خودان دەولەتەکا سەرکەفتی .
 ژ ئالیێ خوە ڤە ئەمیر عەلی، رێڤەبەرێ گشتی یێ رەوشەنبیری و هونەری ل دهۆکێ گۆت: "ئەڤ ئاخا ئەڤرۆ ئەم لێ دژین یا کوردستانێ ب ئایین و ئۆل و نەتەوەیێن د ناڤ دا یا زەنگینە، ئەڤرۆ خوە سەرفەراز دبینین وەکو سازیا رەوشەنبیری بنیاتێ مە ل سەر چەند بنەمایان هاتیە ئاڤاکرن.
 ژوان بنەمایان ئاڤاکرنا مرۆڤی و بەلاڤکرنا هشیارکرنا نەتەوەیی و دوڤچوون و پاراستنا کەلتۆرێ دەڤەرا مە یە، هەروەسا خەلاتکرنا قەشە (لەیس وەعدوللا ئیبراهیم) باشترین نموونا پێکڤەژیانێ یە کو بەری نوکە ب چەندین رێیان خزمەتا ئالایێ پیرۆزێ کوردستانێ ل چەندین وەلاتان کریە و چەندین هاریکاری ژی ب رێیا رێکخراوێن بیانی گەهاندینە ئاوارە و خەلکەکێ دەستکورت ل هەرێما کوردستانێ.