به‌بریاری سه‌رۆکی حکومه‌ت مووچه‌ی سێ مانگی مامۆستایانی وانه‌بێژ خه‌رج ده‌کرێت

به‌بریاری مه‌سرور بارزانی سه‌رۆكی حكومه‌تی هه‌رێمی كوردستان،   مووچه‌ی سێ مانگی مامۆستایانی وانه‌بێژ خه‌رج ده‌كرێت.

 له‌راگه‌یاندراوێكدا كه‌وێنه‌یه‌ك بۆ ماڵپه‌ری كوردستان تیڤى نێردراوه‌، د.ئاڵان حه‌مه‌ سه‌عید ساڵح ڕایگه‌یاند، كه‌ لە کۆبوونەوەی 1 ی 12 ی 2020 ی لیژنەی باڵای روبەروبوونەوەی کۆرۆنا ، بەسەرپەرشتی  وەزیری ناوخۆی حکومەتی هەرێمی کوردستان به‌ڕێوه‌چوو ، كه‌ بەندە و  وەزیری دارایی راسپێردراین کە لە پشووەکانی ناوەندەکانی خوێندن بەهۆی ڤایرۆسی کۆرۆنا ، کۆنووسێک سەبارەت بە شایستە داراییەکانی وانەبێژانی دانەمەزراو بۆ ئەنجومەنی وەزیران بنێرین .

ده‌شڵێت، پاش کۆبوونەوەی هاوبەشی وەزارەتمان و وەزارەتی دارایی ، بەسوپاسەوە لەلایەن  جەنابی سەرۆکی حکومەتی هەرێمی کوردستانەوە  مەسرور بارزانی، پێشنیاری هەردوو وەزارەت پەسەندکرا و بریاردرا  بۆ مانگەکانی  10  و 11 و 12 ی ساڵی 2020 برەپارەیەکی بڕاوەی مانگانە ( مقطوع) وەک شایستەی دارایی مامۆستایانی وانەبێژی دانەمەزراو خەرج بکرێت بەم شێوەیە: 
1- هەڵگری بروانامەی بکالۆریۆس و سەروتر بری (300000) سێ سەد هەزار دینار. 
2- هەڵگری بروانامەی دبلۆم (250000) دووسەدو پەنجا هەزار دینار.

دارشتنه‌وه‌ى هه‌واڵ - شوان عه‌زیز