بەرپرسێ راگەهاندنێ ل رێڤەبەریا گشتی یا ساخلەمیا پارێزگەها دهۆکێ ئاشکرا کر کو د رێورەسمەکی دا سوبەهی رۆژا پێنجشەمبی 10/12/2020 (د. ئەفراسیاب موسا) دێ وەکو رێڤەبەرێ نوی یێ رێڤەبەریا گشتی یا ساخلەمیا پارێزگەها دهۆکێ ب ئامادەبوونا وەزیرێ ساخلەمیا حکومەتا هەرێما کوردستانێ و پارێزگارێ دهۆکێ ل جهێ (د.نزار عسمەت) دەست ب کاربیت.
حەمزە رەزیکی، بەرپرسێ راگەهاندنێ ل رێڤەبەریا گشتی یا ساخلەمیا پارێزگەها دهۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو (د. ئەفراسیاب موسا) ل دووڤ دەنگدانا جڤاتا پارێزگەھا دھۆکێ ل رۆژا ١/٩/٢٠٢٠ێ بۆ پوستێ رێڤەبەرێ گشتی یێ ساخلەمیا پارێزگەھا دھۆکێ هاتبوو هەلبژارتن و ژڤانە سوبەهی رۆژا پێنجشەمبی د رێورەسمەکی دا ب ئامادەبوونا (د.سامان بەرزنجی) وەزیرێ ساخلەمیا حکومەتا هەرێما کوردستانێ و (د. عەلی تەتەر) پارێزگارێ دهۆکێ ل جهێ (د.نزار عسمەت) دەست ب کاربیت.
هەژی گۆتنێ یە کو د. ئەفراسیاب موسا، ل سالا ٢٠٠١ێ ژ کۆلیژا پزیشکی یا زانکۆیا دھۆک دەرچوویە ل سالە ٢٠٠٩ێ ماستەر ب پزیشکی داد ل کۆلیژا پزیشکی زانکۆیا ھەولێر ب دەست خوە ڤە ئینایە و ل سالا ٢٠١٢ێ ماستەر ب کارگێریا کاری و سەرکردایەتیا نێڤدەولەتی ل زانکۆیا ئەمریکی ل سلیمانیێ ب ھەڤپیشکی دگەل زانکۆیا فۆرتوانگن یا ئەلمانی ب دەست خوە ڤە ئینایە و سالا ٢٠١٤ێ و٢٠١٣ێ رێڤەبەرێ بنگەھێن ساخلەمیێ ل ئەترووش و دینارتێ بوویە و سالا ٢٠٠٩ ھەتا سالا ٢٠١٢ێ رێڤەبەرێ نۆشداریا داد بوویە ل دھۆکێ دووڤ دا بوویە رێڤەبەرێ پشکا دوڤچوونێ ل ساخلەمیا دھۆکێ و دووڤ دا ژی بوویە رێڤەبەرێ نەخۆشخانا ئازادی ل دھۆکێ و بوویە رێڤەبەرێ نەخۆشخانا چاڤا ل دھۆکێ سوبەهی ژی دێ وەکو رێڤەبەرێ گشتی یێ ساخلەمیا پارێزگەها دھۆکێ دەست ب کاربیت.
کۆمێنت (0)
تا ئێستا هیچ کۆمێنتێک نەکراوە.