ئەنجومەنێ پارێزگەها دهۆکێ ئەڤرۆ 2/12/2020 کۆمبوونا خۆ یا ئاسایی یا ژمارە (109) ل دۆر سێ تەوەران ئەنجامدا و ژوان بەربژێر بۆ پۆستێن سێ ناحیێن پارێزگەها دهۆکێ پەسەندکرن، هەروەسا ڕاپۆرتا لیژنا چاندن و ژێدەرێن ئاڤێ یا ئەنجومەنێ ناڤهاتی هاتە خواندن و دەنگدان ل سەر هاتەکرن، تەوەرێ سێیێ ژی یێ ڤێ کۆمبوونێ دەنگدان ل سەر گوهۆڕینا ئەندامێن ئەنجومەنی یێن د لیژێن هەردەمی دا و رێکخستنا وان هاتەکرن.
فەهیم عەبدوللا حەمۆ، سەرۆکێ ئەنجومەنێ پارێزگەها دهۆکێ د پرێس کۆنفرانسەکی دا ئاشکرا کر کو ل دەستپێکا کۆمبوونێ دەنگدان ل سەر بەربژێرێن هەر ئێک ژ رێڤەبەرێن ناحیێن (بامەرنێ، دەرکارێ، رۆڤیا) هاتەکرن و هەر ئێک ژ (میران عەبدوللا تاها) ب (25) دەنگێن ئەندامێن ئەنجومەنی بۆ پۆستێ رێڤەبەرا ناحیا (بامەرنێ) ل جهێ (حمید زبیر) هاتە پەسەندکرن، هەروەسا (ئەدیب جەعفەر مستەفا) ب (26) دەنگێن ئەندامێن ئەنجومەنی بۆ پۆستێ رێڤەبەرێ ناحیا (دەرکارێ) ل جهێ (زێرەڤان موسا) هاتە پەسەندکرن، دیسان (عنتەر فەرهاد محەمەد) ب (24) دەنگێن ئەندامێن ئەنجومەنی بۆ پۆستێ رێڤەبەرێ ناحیا (رۆڤیا) ل جهێ (قاسم عەبدولسەمەد) هاتە پەسەندکرن.
ناڤهاتی ئاماژە دا وێ چەندێ کو ئەڤ پۆستێن ئەڤرۆ بەربژارێن وان ژلایێ ئەنجومەنێ پارێزگەها دهۆکێ ڤە هاتینە پەسەندکرن بەری نوکە ددەستێن یەکگرتوویا ئیسلامیا کوردستانێ دابوون، بەلێ پشتی د حکومەتا خۆجهی یا پارێزگەها دهۆکێ دا نەماین ئەو بەربژێرێن ئەڤرۆ هاتینە پەسەندکرن دێ ل جهێ وان هێنە دانان و گۆت: "کەسێن بۆ پۆستێن رێڤەبەریێن سێ ناحیێن پارێزگەها دهۆکێ هاتینە دانان گەنجن و مە باوەریا ب شیانێن وان هەی کو دێ د ئاستێ بەرپرسیارەتیێ دابن".
ناڤهاتی ئاماژە دا وێ چەندێ کو د هەمان کۆمبوون دا دەنگدان ل سەر گوهۆڕینا ئەندامێن ئەنجومەنی یێن د لیژێن هەردەمی دا و رێکخستنا وان هاتەکرن و هاتە پەسەندکرن
کۆمێنت (0)
تا ئێستا هیچ کۆمێنتێک نەکراوە.