جۆن لۆریمه‌ر، ڕاوێژکاری باڵای سەربازیى به‌ریتانیا بۆ ڕۆژهه‌ڵاتی ناوه‌ڕاست و باکوورى ئافریکا دووپاتى کردەوە کە بەریتانیا لە چوارچێوەى هاوپەیمانیى نێودەوڵەتیى دژى داعشدا، لە هاوکارى و پشتگیرکردنى هەرێمى کوردستان و عێراق بەردەوام دەبێت.
سەرلەبەیانیى ئەمڕۆ چوارشەممە 18/11/2020 نێچیرڤان بارزانی، سه‌رۆکی هه‌رێمی کوردستان، پێشوازی له جەنەراڵ جۆن لۆریمه‌ر، ڕاوێژکاری باڵای سەربازیى به‌ریتانیا بۆ ڕۆژهه‌ڵاتی ناوه‌ڕاست و باکوورى ئافریکا و شاندێکى یاوەرى کرد کە دواى کۆتاییهاتنى ئەرکەکەى، بۆ ماڵئاوایى سەردانى بەڕێز سەرۆکى هەرێمى کوردستانى کردبوو.
لە دیدارێکدا کە ستیفن هیکى، باڵیۆزى بەریتانیا لە عێراق ئامادەى بوو، دۆخى عێراق و ناوچەکە و پێویستى و گرنگیى هاوکارى و هەماهەنگى و کارکردن بۆ پاراستنى ئارامى و سەقامگیرى لە ناوچەکە تاوتوێ کرا و وێڕاى ئەوەى کە لۆریمەر بەردەوامیى هاوکارى و پشتگیریى بەریتانیاى بۆ عێراق و هەرێمى کوردستان دووپات کردەوە، سوپاسى و پێزانینى وڵاتەکەى بۆ هاوکارى و هاوبەشى و کارکردن لەگەڵ هەرێمى کوردستان و عێراق دەربرى، نێچیرڤان بارزانیش سوپاسى هاوکارى و پشتگیریى بەریتانیاى بۆ هەرێمى کوردستان کرد و هیواى سەرکەوتنى بۆ جەنەراڵ لۆریمەر خواست.
دوایین پێشهاتەکانى شەڕى تیرۆر و بەرەنگاربوونەى داعش، پەیوەندییەکانى هەولێر ـ بەغدا و گفتوگۆى چارەسەکردنى کێشەکانیان، تێپەڕاندن و پەسەندکردنى یاساى پڕکردنەوەى کورتهێنانى بودجە لە ئەنجومەنى نوێنەرانى عێراق، دۆخى ئەمنیى سنوورەکانى هەرێمى کوردستان و چەند پرسێکى دیکەى جێى بایەخى هاوبه‌ش، بەشێکى دیکەى کۆبوونەوەکە بوون.
کۆمێنت (0)
تا ئێستا هیچ کۆمێنتێک نەکراوە.