سێ هاووڵاتی ڕفێندراوی کورد لە خورماتوو بە پارە ئازادکران

دوای ئەوەی تیرۆریستانی داعش، سێ هاووڵاتیی كوردی خەڵكی سنووری خورماتوویان رفاند، ئەمڕۆ شەممە 12/1/2019 لەبەرامبەر بڕە پارەیەك ئازاد كران.

مانگی رابردوو، تیرۆریستانی داعش هێرشیان كردە سەر گوندی (پارە پارە)ی كوردنشینی سەر بە خورماتوو و لە ئەنجامدا داعش چوار هاووڵاتیی رفاند و یەكێك لە هاووڵاتییەكان هەر ئەوكات توانی خۆی لە دەستی داعش رزگار بكات، بەڵام سێ هاووڵاتییەكەی دیكە بەرفێنراوی لای داعش مانەوە.

پێشتر، ئازاد رۆستەم، بەرپرسی یەكێتیی لە داقووق، ڕای گەیاندبوو كە داعش لە بەرامبەر ئازادکردنی ئەو هاووڵاتیانەی دانیشتووی گوندی (پارە پارە) كە دەكەوێتە رێگای نێوان داقووق-خورماتوو داوای بڕی 150 دەفتەر دۆلاری كردووە.

محەمەد فایەق، بەرپرسی پێشووی بەشی راگەیاندنی قایمقامییەتی خورماتوو، لە ئەكاونتی خۆی لە تۆڕی كۆمەڵایەتی (فەیسبووك) ڕای گەیاندووە، ئەو هاووڵاتییانەی گوندی (پارە پارە)ی سنووری خورماتوو كە پێشتر لەلایەن داعشەوە ڕفێنرابوون، ئەمڕۆ شەممە 12/1/2019، بە بڕی 35000 دۆلاری ئەمریكی ئازاد كراون و گەشتنەوە ناو كەسوكارەكانیان.

شایه‌نی باسه‌ به‌ هۆی خیانه‌تی 16ی ئۆكتۆبه‌ری ساڵی 2017 ئه‌م ناوچه‌یه‌ كه‌وته‌ ده‌ست چه‌كدارانی حه‌شدی شه‌عبی و له‌م رۆژه‌ سه‌رباری هێزی ئه‌منی زۆر ره‌وشی ئه‌منیان پێ كۆنترۆڵ ناكرێت، ناوه‌ ناوه‌ داعش هاووڵاتیان ده‌ڕفێنێت دوای پاره‌ له‌ خێزانه‌كانیان ده‌كه‌ن.