له لێدوانێكدا عه‌مید "سه‌رحه‌د قادر" به‌ڕێوه‌به‌ری پۆلیسی قه‌زاو ناحییه‌كانی كه‌ركوك، تایبه‌ت به ماڵپه‌ری ده‌زگای سه‌ته‌لایتی كوردستان رایگه‌یاند:كه‌ركوك ئارامی له ده‌ست داوه و هێزه‌كانی سوپای عێراق توانای پاراستنی شاره‌كه‌یان نییه، بۆ گه‌رانه‌وه‌ی ئارامی و ئاسایشی ناوچه‌كه، پێویسته هێزه كوردییه‌كان بگه‌ڕێنه‌وه بۆ كه‌ركوك و پارێزگاری له ناوچه‌كه بكه‌ن.
گوتیشی: تا ئێمه له كه‌ركوك بووین 350 تریۆرستمان له چه‌ندان ئۆپه‌راسیۆندا ده‌ستگیر كردووه، به‌ڵام تا ئێستا هێز عێراقیه‌كان ئۆپه‌راسیۆنێكیان ئه‌نجام نه‌داوه.
هه‌روه‌ها گوتیشی: گه‌رانه‌وه‌ی هێزه كوردییه‌كان له جاران به‌هێزتر ده‌بێت و ئێمه به سه‌نگ و هێزێكی زیاتره‌وه ده‌گه‌ڕێینه‌وه بۆ كه‌ركوك و ئارامی له شاره‌كه‌دا ده‌سته‌به‌ر ده‌كه‌ینه‌وه.
هه‌ر به پێی زانیارییه‌كانی ده‌زگای سه‌ته‌لایتی كوردستان: بۆ گه‌رانه‌وه‌ی هێزه كوردییه‌كانی هه‌رێم ژووری هه‌ماهه‌نگی له نێوان هه‌رێم و عێراق و ئه‌مریكا دروستكراوه و تاوتوێی ئه‌و بابه‌ته به‌ره‌و قۆناغی كۆتایی رۆیشتووه‌و كاری به‌رده‌وامی له‌سه‌ر ده‌كرێت.
کۆمێنت (0)
تا ئێستا هیچ کۆمێنتێک نەکراوە.