به‌ڕێوه‌به‌رایه‌تیی پۆلیسی پارێزگای هه‌ولێر، به هاوكاریی ئاسایش و پۆلیسی هاتوچۆ و سه‌رجه‌م هێزه ئه‌منییه‌كانی تر، پلانێكی ئه‌منی بۆ رۆژانی جه‌ژنی نه‌ورۆز داده‌ڕێژێت.
لیوای مافپه‌روه‌ر عه‌بدولخالق ته‌ڵعه‌ت، به‌ڕێوه‌به‌ری پۆلیسی پارێزگای هه‌ولێر ڕایگه‌یاند: به‌ڕێوه‌به‌رایه‌تییه‌كه‌یان به هاوكاری و هه‌ماهه‌نگیی ئاسایش و پۆلیسی هاتوچۆ، نه‌هێشتنی تاوان و پۆلیسی به‌رگریی شارستانی و تێكڕای هێزه ئه‌منییه‌كانی دیكه، پلانێكی ئه‌منیی تۆكمه‌ی داڕشتووه.
لیوا عه‌بدولخالق ده‌ڵێت: له پلانه ئه‌منییه‌كه‌دا تیمه‌كانمان له ناوشاردا له ئاماده‌باشیی ته‌واودا ده‌بن و رێگری له هه‌ر حاڵه‌تێكی نایاسایی و نائاسایی ده‌كه‌ن.
به‌ڕێوه‌به‌ری پۆلیسی پارێزگای هه‌ولێر هه‌روه‌ها ئه‌وه‌یشی خسته روو: وێڕای مه‌فره‌زه‌ی گه‌ڕۆك كه له ناو كۆڵان و گه‌ڕه‌كه‌كاندا به به‌رده‌وامی ده‌گه‌ڕێن، هێزه هاوبه‌شه‌كه‌یان له سه‌یرانگاكانیشدا رێوشوێنی پێویستی ئه‌منی ده‌گرنه به‌ر.
ده‌شڵێت: پلانه‌كه له 11ی ئه‌م مانگه‌وه ده‌ستی پێكردووه و تا دوای نه‌ورۆزیش به‌رده‌وام ده‌بێت.
ئاماژه‌ی بۆ ئه‌وه‌ش كردووه: پێشبینی ده‌كرێت گه‌شتیارێكی زۆر له ناوه‌ڕاست و خوارووی عێراقه‌وه سه‌ردانی هه‌ولێر و ده‌وروبه‌ری بكه‌ن و، بۆ ئه‌و مه‌به‌سته‌یش هه‌مانگییه‌كی ته‌واو له‌گه‌ڵ قایمقامیه‌تی قه‌زای ناوه‌ندیی هه‌ولێردا كراوه تا ئاسانكاری بۆ گه‌شتیاران بكرێت.
کۆمێنت (0)
تا ئێستا هیچ کۆمێنتێک نەکراوە.