لە ژێر چاودێری قائیمقامیەتی قەزای چۆمان، بەرێوەبەرایەتی گەشتوگوزاری چۆمان و كۆمپانیای كه‌رتی تایبه‌تی گه‌شتیاری (Vik Group)سێیەمین فێستیڤاڵی خلیسکانێی سەر بەفر بە بەشداری تیمی سکیوانی نێودەوڵەتی کە ٦ یاریزانی ئەوروپین، ساز ده‌كرێت.
عومه‌ر حوسێن، به‌رپرسی گرووپی گه‌شتیاری Vik Group به سایتی ده‌زگای سه‌ته‌لایتی كوردستانی رایگه‌یاند: رۆژی 3-2-2018 فێستیڤاڵه‌كه به هاوكاری كۆمپانیایه‌كی گه‌شتیاری به‌ریتانی Untamed Border ساز ده‌كرێت له ناوچه‌ی (سێكانیان) له سنووری قه‌زای چۆمانی سه‌ر به پارێزگای هه‌ولێر.
راشیگه‌یاند: جگه له تیمی یاریزانه نێوده‌وڵه‌تییه‌كان، گروپی خلیسكێنه‌ی پێنجوێن و چۆمانیش به‌شدارن و چه‌ندین پێشبركێی سه‌رنجراكێش و سه‌ركێشی ئه‌نجام ده‌ده‌ن. ئامانج له‌م فیستیڤاڵه‌ش ناساندنی باڵەکایەتیە لەسه‌ر بنەمای کەرتی گەشتیاری زستانەو دروستکردنی تیمێکی سکیوانیە لە ناوچەکە.
هه‌ر له‌و فێستیڤاڵه‌دا بڕیاره وه‌ك خزمه‌تێك به منداڵان و كچانی به‌شداربووی فیستیڤاڵه‌كه، چه‌ند خلیسكانه‌ی تایبه‌ت له وڵاتی رووسیا و جل و به‌رگی تایبه‌تی ئه‌م یارییه بگاته فیستیڤاڵه‌كه و دوو راهێنه‌ری تایبه‌تی به‌ریتانی و ئه‌مریكی بێبه‌رانبه‌ر راهێنان به منداڵان و كچانی به‌شداربوو بكات.
هاوكات هه‌ر له‌و فێستیڤاڵه‌دا جگه له یاری سه‌ركێشی، به گۆرانی و هه‌ڵپه‌ركێی كورده‌واری و چه‌ند بڕگه‌یه‌كی تری كه‌یفخۆشی فێستیڤاڵه‌كه ده‌ڕازێندرێته‌وه.
ناوچه‌ی باڵه‌كایه‌تی به دووری 150 كیلۆمه‌تر كه‌وتۆته باكوری شاری هه‌ولێر و ساڵانه فیستیڤاڵی یارییه سه‌ركێشییه‌كانی سه‌ر به‌فری تێدا ئه‌نجام ده‌درێت، ئه‌مه‌ش وه‌ك هه‌وڵێك بۆ ناساندنی ناوچه‌كه و گه‌شتیاری زستانه له هه‌رێمی كوردستان، كه له‌ناو جه‌رگه‌ی زۆنی ناشناڵپاركی هه‌ڵگورد-سه‌كرانه.
ئاماده‌كردن:كه‌ریم سمكۆ
کۆمێنت (0)
تا ئێستا هیچ کۆمێنتێک نەکراوە.