ئه‌نجوومه‌نی سیناتی ئه‌مریكا به په‌سه‌ندكردنی بڕیارنامه‌یه‌ك كه 32 سیناتۆری كۆماری و دیموكراته‌كان پێشنیاریان كردبوو، ئازار و ئه‌شكه‌نجه‌ی به‌هاییه‌كان و پێشێل كردنی مافی كه‌مینه‌كان له‌لایه‌ن حكومه‌تی ئێرانه‌وه ئیدانه ده‌كات.
ئه‌م بڕیارنامه‌یه كه به پشتیوانییی هه‌مه‌لایه‌نه‌ی ئه‌ندامانی سیناتی ئه‌مریكا په‌سه‌ندكراوه، تیایدا هاتووه كه به‌رده‌وامبوونی ئازار و ئه‌شكه‌نجه‌ی به‌هاییه‌كان له‌ناو ئێران، پێشێل كردنی بێباكانه‌ی مافه بنه‌ڕه‌تییه‌كانی مرۆڤه و له كۆمه‌ڵگای نێوده‌وڵه‌تیدا جێگه‌ی نابێته‌وه.
فه‌رهاد سابتیان نوێنه‌ری كۆمه‌ڵگه‌ی به‌هاییه‌كان سه‌باره‌ت به گرنگیی په‌سه‌ندكردنی بڕیارنامه‌كه و هه‌ڵوێستی كۆمه‌ڵگه‌ی به‌هاییه‌كان وتی: كۆمه‌ڵگه‌ی به‌هاییه‌كان زۆر خۆشحاڵه كه كۆمه‌ڵگه‌ی نێوده‌وڵه‌تیی له وڵاته جۆراوجۆره‌كانی ئه‌وڕوپا و ئه‌مریكای باكوور و نه‌ته‌وه یه‌كگرتووه‌كان گرنگی به پێشێلكارییه‌كانی مافی مرۆڤی له ئێران ده‌دات و به‌رگریی له‌و كه‌مینه ئه‌تنیكیانه ده‌كات كه مافه‌كانیان پێشێل ده‌كرێت.
ئه‌و بڕیارنامه‌یه تیایدا هاتووه كه له ساڵی 1979 به‌دواوه به‌رپرسانی كۆماری ئیسلامیی ئێران زیاتر له 200 كه‌س له رێبه‌رانی به‌هاییه‌كانیان له‌سێداره‌داوه و زیاتر له هه‌زار به‌هایی له‌سه‌ر كاره‌كانیان له داموده‌زگا حكومه‌تییه‌كان ده‌ركراون و هه‌روه‌ها له خوێندنی زانكۆ بێبه‌ش كراون، هه‌روه‌ها له 10 ساڵی رابردوودا نزیكه‌ی 850 به‌هایی به‌بێ هۆكار ده‌ستگیر كراون.
هه‌روه‌ها له بڕیارنامه‌كه‌دا داوا له سه‌رۆك كۆمار و وه‌زیری ده‌ره‌وه‌ی ئه‌مریكا كراوه كه له رێگه‌ی ئه‌و بڕیارنامه‌یه‌وه چه‌ند سزایه‌ك بۆ به‌رپرسانی كۆماری ئیسلامیی ئێران دیاریی بكه‌ن به‌هۆی ئه‌وه‌ی ده‌ستدرێژیی و پێشێلكاریی مافی مرۆڤ له به‌رامبه‌ر هاووڵاتییانی ئێران ئه‌نجامده‌ده‌ن.
سه‌رچاوه / ده‌نگی ئه‌مریكا
مه‌سعود / كوردستان تی ڤی
کۆمێنت (0)
تا ئێستا هیچ کۆمێنتێک نەکراوە.