چه‌كدارانی میلیشیایی به‌در به جلی ڕه‌شه‌وه،ده‌یانه‌وه‌ی خانووی ماڵه كورده‌كان له دوزخورماتوو بكه‌نه باره‌گای خۆیان و كورده‌كانیش ئاماده‌نین ئه‌و خانووانه چۆڵ بكه‌ن.
به پێی هه‌واڵێكی ماڵپه‌ری وشه، شه‌وی ڕابردوو و به‌ره‌به‌یانی ئه‌مڕۆ چوارشه‌م، دوو ئۆتۆمبێلی چه‌كدارانی میلیشیایی به‌در به جلی ڕه‌شه‌وه، هه‌ڵیانكوتاوه‌ته سه‌ر 12 ماڵ و ئاگاداریان كردوونه‌ته‌وه كه پێویسته ماڵه‌كانیان چۆڵ بكه‌ن و خورماتوو جێ بهێڵن.
له‌مباره‌یه‌وه شایه‌تحاڵێكی هه‌ڵكوتانه‌سه‌ری ماڵه كورده‌كان گوتی: هه‌ڵیانكوتایه سه‌ر ماڵه‌كانمان و پێیان گوتین ده‌بێ به ته‌واوی ماڵه‌كان چۆڵ بكه‌ین، هاتوونه‌ته سه‌ر 12 ماڵ و ئه‌وان ده‌یانه‌وێ ئه‌و ماڵانه بكه‌ن به باره‌گای خۆیان، به‌ڵام ئێمه ئاماده نین ئه‌و خانووانه چۆڵ بكه‌ین.
سه‌باره‌ت به هه‌مان پرس، محه‌مه‌د فایه‌ق، به‌رپرسی ڕاگه‌یاندنی قایمقامیه‌تی خورماتوو گوتی: به‌دواداچوونمان بۆ ئه‌و ده‌ستدرێژییه كردووه و ده‌ركه‌وت ئه‌و كه‌سانه‌ی به جلی ڕه‌شه‌وه هاتوونه‌ته سه‌ر ماڵه‌كان، سه‌ر به میلیشیاكانی به‌در بوونه، له سنووری گه‌ڕه‌كی عه‌سكه‌ری خورماتوو بۆشایییه‌ك له نێوان كورد و توركمانی شیعه هه‌یه و چه‌كدارانی به‌در ویستوویانه خانوویه‌كی كۆنی ئه‌و شوێنه بكه‌ن به باره‌گای خۆیان.
كوردستان تیڤی: رزگار تاهیر
کۆمێنت (0)
تا ئێستا هیچ کۆمێنتێک نەکراوە.