له‌شاری سنه‌ی رۆژهه‌ڵاتی كوردستان ناوه‌ندی چاندی كۆمه‌ڵایه‌تیی زاگرۆس به به‌شداریی ژماره‌یه‌كی به‌رچاو له چالاكانی شاری سنه كراییه‌وه.
سه‌ره‌تای به‌رنامه‌كه بۆ ڕێزگرتن له یادی مام جه‌لال و سه‌رجه‌م تێكۆشه‌رانی ڕێگه‌ی رزگاری كوردستان به‌شداربوان خوله‌كێك هه‌ستانه سه‌رپێ و پاشان هه‌ریه‌ك له جه‌بار ده‌ست‌باز، موحسێن مورادی، د. حوسێن محمه‌دزاده، عیرفان ساعیدپه‌نا، سه‌باح موفیدی، سوهه‌یلا محمدپوور، جه‌هانگیر هاشمی له‌سه‌ر گرنگیی ناوه‌نده‌كانی چالاكیی و رێزگرتن و فێركاری زمانی دایك قسه‌یان كرد
ئامانجی ئه‌م ناوه‌نده به مه‌به‌ستی فێركاریی زمانی كوردی له هه‌لومه‌رجی ئێستا كه له زانكۆ و قوتابخانه‌كان به‌و شێوه‌یه‌ی كه ده‌بێ فێركاری زمانی دایكی ئه‌نجام نادرێ، به‌رێوه ده‌چێت، له‌ڕاستیدا له ڕۆژهه‌ڵات حیزب و دامه‌زراوه‌یه‌ك كه بتوانێ به شیوه‌یه‌كی فه‌رمی یارمه‌تیی خه‌ڵك بدات و فێركاری ڕۆشنبیری ئه‌نجام بدات نییه، بۆیه حوزووری NGOكان و به‌رده‌وامییان له چالاكیی كاری فه‌رهه‌نگی و كۆمه‌ڵایه‌تی بۆ روونكردنه‌وه‌ی بارودۆخه‌كه و ناساندنی مێژوو و ئامانجی گه‌لی كورد به خه‌ڵك به تایبه‌ت لاوان و قوتابیان زۆر پێویسته.
ئه‌ندامانی دامه‌زراوه‌ی زاگرۆس پێشتر وه‌كوو كه‌سانێك كه خه‌می گه‌ل و نیشتمان و ئامانجه سه‌ره‌كییه‌كانی گه‌لی كوردیان هه‌بووه، له ناوه‌نده‌كانی فه‌رهه‌نگی، كۆمه‌ڵایه‌تی و زانكۆكان هه‌وڵ و تیكۆشانی زۆریان داوه، به‌ڵام به‌هۆی ناله‌باربوونی بارودۆخه‌كه و قه‌یرانی ئابووری زۆربه‌ی ئه‌و دامه‌زراوانه داخراون.
ئێستا ئه‌م ئه‌ندامانه وه‌كوو ده‌سپێكی دووباره، دامه‌زراوه‌ی فه‌رهه‌نگی و كۆمه‌ڵایه‌تی زاگرۆسیان به مه‌به‌ستی فێركاریی زمانی كوردی و ڕۆشنبیری و كاركردن بۆ گه‌لی كورد دامه‌رزاندووه.
ناوه‌رۆكی كاره‌كه فێركاریی زمانی یه‌كگرتووی كوردی، به ئه‌لف و بێی سۆرانی و لاتین، هه‌روه‌ها به‌شی په‌روه‌رده بۆ ناساندی جوگرافیا و مێژوو و چالاكییه‌كانی گه‌لی كورد له ده‌وه‌ری مێژوویی ئه‌م نه‌ته‌وه‌یه.
پۆله فێركارییه‌كانی دامه‌زراوه‌ی زاگرۆس بریتین له
- ڕێنووسی ئارامی و لاتینی كوردی - ڕێزمانی كوردی سۆرانی (زاراوه‌ی فه‌رمی)
-زانسته مرۆییه‌كان كه بریتییه له: جوگرافیای كوردستان، مێژووی كوردستان، كۆمه‌ڵناسی، مافناسی ڕامیاری.
به‌شه‌كانی دیكه‌ش بریتی ده‌بن له: هاوبیری، زمانی ئینگلیزی و چه‌ندین په‌نێل و كارگه‌ی فێركاریی دیكه.
كوردستان تیڤی/ كامه‌ران حاجی
کۆمێنت (0)
تا ئێستا هیچ کۆمێنتێک نەکراوە.