نووسینگەی سەرۆک وەزیرانی ئیسرائیل ڕایگەیاند، پڕۆسە سەربازییە هاوبەشەکانی ئەمریکا و ئیسرائیل دژی "ڕژێمی ئێران" و تێکشکاندنی ئەو لایەنانەی کە تەلئەڤیڤ وەک "تەوەرەی تیرۆر" ناویان دەبات، دەرفەتێکی مێژوویی بۆ فراوانکردنی بازنەی ئاشتی لە ناوچەکەدا ڕەخساندووە.
ئەم هەڵوێستەی ئیسرائیل ئاماژەیە بۆ ئەوەی کە فشارە سەربازییەکان بۆ سەر تاران، هاوکێشە سیاسییەکانی ڕۆژهەڵاتی ناوەڕاستیان بە تەواوی گۆڕیوە.
بەپێی ڕاگەیەندراوێکی فەرمیی نووسینگەی بنیامین نەتانیاهۆ کە ئەمڕۆ پێنجشەممە 23ی تەممووزی 2026 بڵاوکرایەوە، هێرشە سەربازییە چڕەکان بۆ سەر ژێرخانی سەربازیی کۆماری ئیسلامی ئێران، زەمینەی ئەوەی خۆش کردووە تاوەکو وڵاتانی دیکەی ناوچەکە بێنە ناو بازنەی ڕێککەوتنەکانی ئاشتییەوە. نووسینگەی سەرۆک وەزیران جەختی لەسەر گوتەکانی دۆناڵد ترەمپ کردەوە و ڕایگەیاند، چوونی شانشینی سعوودیە بۆ ناو "ڕێککەوتنەکانی ئیبراهیم" بە بازدانێکی مێژوویی بەرەو ئاشتی لە ڕۆژهەڵاتی ناوەڕاست دادەنرێت.
ڕاگەیەندراوەکە بە دروشمی "ئاشتی لە ڕێگەی هێزەوە" کۆتایی هاتووە، کە ئاماژەیە بۆ ستراتیژیی نوێی واشنتۆن و تەلئەڤیڤ کە پێیان وایە تەنها لە ڕێگەی باڵادەستیی سەربازییەوە دەتوانرێت ئارامیی هەمیشەیی بچەسپێنرێت. ئەم لێدوانانە لە کاتێکدایە کە سوپای ئەمریکا بۆ 11 شەو لەسەریەک بۆردومانەکانی بۆ سەر ئامانجە سەربازییەکان لە ناو جەرگەی خاکی ئێراندا بەردەوامە.
چاودێرانی سیاسی ئاماژە بەوە دەکەن کە ئیسرائیل دەیەوێت سوود لەو بارودۆخە سەربازییە وەربگرێت کە ئیدارەی ترەمپ دروستی کردووە، تاوەکو فشارەکان بۆ سەر ڕیاز زیاتر بکات بۆ ئاساییکردنەوەی پەیوەندییەکان. پێشتر سەرۆکی ئەمریکا ڕایگەیاندبوو کە هەر جۆرە هاوکارییەکی ئەتۆمی لەگەڵ سعوودیە، مەرجدارە بە ناسینی فەرمیی دەوڵەتی ئیسرائیل و واژۆکردنی ڕێککەوتننامەی ئاشتی لەگەڵ تەلئەڤیڤ.
کۆمێنت (0)
تا ئێستا هیچ کۆمێنتێک نەکراوە.