لەسەر ڕێگەی شارەدێی ئاشتی بۆ شارۆچكەی کۆیە، بەهۆی پێکدادانی توندی نێوان دوو ئۆتۆمبێلی بارهەڵگر، سێ کەس گیانیان لەدەست دا و دووانی دیکەش برینداربوون.
بەگوێرەی ڕاگەیەندراوێکی بەڕێوەبەرایەتی بەرگریی شارستانی کۆیە، کاتژمێر 6:50 خولەکی ئێوارەی ئەمڕۆ دووشەممە تیمەکانیان ئاگادارکراونەتەوە لە ڕووداوەکە. بەهۆی توندی پێکدادانەکەوە، هەردوو بارهەڵگرەکە دەستبەجێ ئاگریان گرتووە.
بەرگریی شارستانی کۆیە ڕایگەیاند: "تیمەکانمان دەستبەجێ گەیشتنە شوێنی ڕووداوەکە و توانییان لە ماوەیەکی کورتدا ئاگرەکە کۆنتڕۆڵ بکەن، بەڵام بەداخەوە بەهۆی سەختی ڕووداوەکەوە شۆفێری هەردوو بارهەڵگرەکە و ئافرەتێکی مەدەنی گیانیان لەدەست دا، هەروەها دوو کەسی دیکەش برینداربوون."
لە کۆتایی ڕاگەیەندراوەکەدا، بەڕێوەبەرایەتییەکە داوا لە شۆفێران دەکات پابەندی ڕێنماییەکانی هاتوچۆ بن و لە کاتی ڕووداوەکاندا هاوکاری تیمەکانی بەرگریی شارستانی بکەن، تاوەکو بتوانن بە زووترین کات گیانی لێقەوماوان ڕزگار بکەن.
کۆمێنت (0)
تا ئێستا هیچ کۆمێنتێک نەکراوە.