بەڕێوەبەرایەتی پۆلیسی پارێزگای هەولێر ڕوونکردنەوەیەکی فەرمی لەبارەی ڕووداوی تەقەکردنەکەی ئەمشەوی ناحیەی کەورگۆسک بڵاوکردەوە و ڕایگەیاند، بەهۆی کێشەیەکی کۆمەڵایەتیی کۆنەوە لە نێوان بنەماڵەیەکدا کە خاڵ و خوارزای یەکترن، 6 کەس لە هەردوولا کوژراون و 3 کەسی دیکەش برینداربوون.
بەپێی ڕاگەیەندراوەکەی پۆلیس، ڕووداوەکە کاتژمێر (10:50)ی ئەمشەو لە سنووری قەزای خەبات ڕوویداوە. پۆلیسی هەولێر جەختی کردووەتەوە کە تیمەکانیان دەستبەجێ گەیشتوونەتە شوێنی ڕووداوەکە بۆ کۆنترۆڵکردنی بارودۆخەکە و ڕێگریکردن لە پەرەسەندنی زیاتری گرژییەکان. هەروەها ئاماژە بەوە دراوە کە بە بڕیاری دادوەری لێکۆڵینەوە، تەواوی ڕێکارە یاسایییەکان دەستپێکراون و جەخت لە سەروەریی یاسا کراوەتەوە لە مامەڵەکردن لەگەڵ بکەرانی ئەم ڕووداوەدا.
ئەم ڕووداوە لە کاتێکدایە کە کێشە کۆمەڵایەتییەکان و ململانێی نێوان بنەماڵەکان جاروبار دەبنە هۆی دروستبوونی گرژیی ئەمنی لە ناوچە جیاوازەکان، بەڵام هێزە ئەمنییەکانی هەرێمی کوردستان بەردەوام جەخت لە کۆنترۆڵکردنی چەکی بێ مۆڵەت و ڕادەستکردنی تۆمەتباران بە دادگا دەکەنەوە. ناحیەی کەورگۆسک کە دەکەوێتە ڕۆژئاوای شاری هەولێر، ئەمشەو
بەهۆی ئەم ڕووداوە ناخۆشەوە کەوتووەتە ژێر چاودێریی توندی هێزە ئەمنییەکان تاوەکو سەقامگیری بۆ ناوچەکە بگەڕێتەوە.
کۆمێنت (0)
تا ئێستا هیچ کۆمێنتێک نەکراوە.