ژووری ئۆپەراسیۆن بۆ بەڕێوەبردنی قەیران و کارەسات، ئاگادارییەکی بەپەلەی بۆ هاووڵاتییان بڵاوکردەوە و تێیدا هۆشداری دەدات لە شەپۆلێکی بەهێزی بەفر و باران کە لە رۆژی دووشەممە (12ی کانوونی دووەمی 2026)ەوە روو لە ناوچە جیاجیاکانی هەرێمی کوردستان دەکات.
پاشنیوەڕۆی دووشەممە لە سنووری ئیدارەی زاخۆ بە بارانی کەم دەستپێدەکات، و بەیانی سێشەممە تەواوی ناوچەکانی هەرێم دەگرێتەوە. شەپۆلەکە تاوەکو رۆژی پێنجشەممە (15ی کانوونی دووەم) بەردەوام دەبێت.
پێشبینی دەکرێت زۆرترین بڕی بارانبارین لە دهۆک و زاخۆ بێت کە دەگاتە سەرووی 40 ملم. لە سلێمانی و سۆران +35 ملم، هەڵەبجە و راپەڕین +30 ملم، هەولێر +25 ملم و کەرکوک +20 ملم باران دەبارێت.
بەیانی رۆژی چوارشەممە، پێشبینی بەفربارین لە ناوچە شاخاوییەکان و سەنتەری پارێزگاکانی (سلێمانی، دهۆک و هەڵەبجە) دەکرێت. هاوکات پلەکانی گەرما بە رێژەی (4 بۆ 6) پلە دادەبەزن.
ژووری ئۆپەراسیۆنەکان هۆشداری دەدات کە بەهۆی چڕی بارانبارین لە زاخۆ و راپەڕین، ئەگەری بەرزبوونەوەی ئاستی ئاو و دروستبوونی لافاو هەیە.
داوا لە هاووڵاتیانی خۆشەویست دەکرێت بۆ پاراستنی سەلامەتییان، لەم چەند رۆژەدا رێکاری پێویست بگرنەبەر و ئاگاداری گۆڕانکارییەکانی کەشوهەوا بن. ئاماژە بەوەش کراوە کە بەهۆی گۆڕانکارییەکانەوە ئەگەری گۆڕان لە بڕی دابارینەکاندا هەیە.
کۆمێنت (0)
تا ئێستا هیچ کۆمێنتێک نەکراوە.