میدیاکانی ئەمریکا بڵاویان کردەوە، نیکۆلاس مادۆرۆ، سەرۆکی ڤێنیزوێلا گەیەنراوەتە زیندانی "مێترۆپۆلیتان" لە ناوچەی برۆکلین، کە یەکێکە لە زیندانە هەرە بەناوبانگ و پڕ لە مشتومڕەکانی ویلایەتە یەکگرتووەکانی ئەمریکا.
بەپێی ڕاپۆرتەکان، مادۆرۆ بەرەبەیانی ڕۆژی شەممە گەیشتووەتە بنکەیەکی سەربازی لەناو خاکی ئەمریکا. دواتر گوازراوەتەوە بۆ نووسینگەکانی ئیدارەی بەرەنگاربوونەوەی ماددە هۆشبەرەکان (DEA) لە نیویۆرک. لەوێ بە فەرمی تۆمەتەکانی "بازرگانیکردن بە ماددەی هۆشبەر و چەک"ی ئاراستە کراوە، پێش ئەوەی ڕەوانەی زیندانی برۆکلین بکرێت. ئەمە لە کاتێکدایە کە مادۆرۆ پێشتر هەموو ئەو تۆمەتانەی ڕەت کردووەتەوە کە باس لەوە دەکەن ئەو سەرکردایەتیی کارتێلێکی ماددەی هۆشبەری کردبێت.
بڕیارە لە چەند ڕۆژی داهاتوودا مادۆرۆ و هاوسەرەکەی لەبەردەم دادوەرێک لە نیویۆرک ئامادەبن، بەڵام هێشتا کاتی دادگاییکردنەکەیان ڕانەگەیەنراوە.
چاوەڕوان دەکرێت مادۆرۆ تا هەفتەی داهاتوو لە زیندانی برۆکلین بمێنێتەوە، تا ئەو کاتەی لە دادگای فیدراڵی مانهاتن ڕووبەڕووی تۆمەتەکان دەبێتەوە. سەبارەت بە بارودۆخ و شوێنی دەستبەسەرکردنی هاوسەرەکەی، تا ئێستا زانیارییەکان ناڕوونن.
زیندانی مێترۆپۆلیتان؛ شوێنی ناودارەکان و مەرگی بێدەنگ
زیندانی مێترۆپۆلیتان (MDC Brooklyn) تاکە زیندانی فیدراڵییە لە شاری نیویۆرک و بەوە ناسراوە کە چەندین تۆمەتباری ناسراوی تێدا دەستبەسەر کراوە؛ لەوانە: "شان دیدی کۆمبز" (پف دادی)، "گیسلاین ماکسوێڵ" هاوکاری جێفری ئەپستاین، و گۆرانیبێژی ناسراو "ئاڕ کێلی".
ئەم زیندانە ناوبانگێکی خراپی هەیە بەهۆی توندوتیژیی ناوخۆیی، خراپیی بارودۆخی ژیان و کەمتەرخەمی لە چاودێریی پزیشکی. لە ڕاپۆرتەکاندا هاتووە کە پێشتر زیندانییەک دوای ئەوەی چەندین جار چەقۆی لێ دراوە، هیچ چارەسەرێکی پزیشکیی بۆ نەکراوە و بۆ ماوەی 25 ڕۆژ لە ژوورەکەی خۆیدا بە تەنیا زیندانی کراوە.
کۆمێنت (0)
تا ئێستا هیچ کۆمێنتێک نەکراوە.