مەحموود عەباس سەرۆكی فەڵەستین داوای لە بزووتنەوەی حەماس كرد بارمتەكان ئازاد بكات و دەستبەرداری بەڕێوەبردنی غەززە بێت بۆ ئەوەی چیتر خوێنی هاووڵاتییان نەڕێژرێت.
مەحموود عەباس لە پەیوەندییەكدا لەگەڵ لیژنەی وەزاری عەرەبی ئیسلامی گوتی: پێویستە حەماس واز لە دەسەڵاتی بەڕێوەبردنی غەززە بێنێت كە لە ساڵی 2007ـەوە بەهێز و كودەتا هاتووە، ئەم كودەتایەش پێویستە كۆتایی پێ بێت كە تەنیا زیانی بۆ هاووڵاتییانی فەڵەستینی هەبووە.
راشیگەیاند: پێویستە بارمتە ئیسڕائیلییەكان ئازاد بكرێن بۆ ئەوەی چیتر خوێن نەڕێژرێت و لەبەرامبەریشدا زیندانیانی فەڵەستینیش ئازاد بكرێن، هەروەها دەبێت بە هەر شێوازێك بێت جەنگ رابگیرێت و كۆمەك و هاوكارییەكان بگەیەنرێنە غەززە.
سەرۆكی فەڵەستین جەختیشی كردەوە كە ئەوان وەك رێكخراوی رزگاریخوازی فەڵەستین ئامادەن دووبارە دەسەڵاتی بەڕێوەبردنی غەززە وەربگرنەوە و بەگوێرەی یاسا نێودەوڵەتییەكان مامەڵە لەگەڵ سەرجەم كێشەكان بكەن و ئاسایش و سەقامگیری بۆ تەواوی فەڵەستین بگەڕێننەوە.
ئاماژەی بەوەش دا كە ئەوان ئامانجیانە گەلی فەڵەستین لە هەموو جۆرە توندوتیژی و تیرۆر و جەنگێك دوور بخەنەوە.
کۆمێنت (0)
تا ئێستا هیچ کۆمێنتێک نەکراوە.