عێراق.. مەترسییەكە لە لووتكەیە و ماددە هۆشبەرەكان گەیشتوونەتە نێو قوتابخانە و فەرمانگەكانی حكوومەت

بەكارهێنان و بازرگانیكردن بە ماددەی هۆشبەر لە عێراق گەیشتۆتە ئاستێك ئیتر رووبەڕووبوونەوەی زەحمەت بێت، بەشێوەیەك كە ئێستا لەنێو قوتابخانە و ناوەندەكانی خوێندن و فەرمانگەكانی حكوومەت بە ئاشكرا دەكێشرێ و مامەڵە و بازرگانی پێ دەكرێت.

زۆربوونی حاڵەتەكانی بەكارهێنان و بازرگانیكردن بە ماددەی هۆشبەر، وای لە حكوومەتی عێراق كردووە سەرجەم مامۆستا و فەرمانبەرانی دەوڵەت بەناچاری پشكنینی ماددەی هۆشبەر ئەنجام بدەن، ئەم بڕیارەش لە تۆڕەكانی كۆمەڵایەتی دەنگۆیەكی گەورەی دروستكردووە و ناڕەزایەكی زۆری لێ كەوتۆتەوە.

ئەنجامدانی پشكنینی بەزۆری ماددەی هۆشبەر بووەتە هۆكاری ئەوەی بەشێكی زۆر لە مامۆستایان و فەرمانبەرانی سەر بە وەزارەتی پەروەردە رەخنەی توند بگرن و ئەنجامدانی پشكنینە رەت بكەنەوە، لەمبارەیەوە كەریم سەید گوتەبێژی وەزارەتی پەرەوەردەی عێراق رایدەگەیەنێت، بڕیاری ئەنجامدانی پشكنینی بەزۆری ماددەی هۆشبەر لەلایەن وەزارەتەكەیان دەرنەكراوە و بەڵكو لەلایەن لیژنەی پەروەردە لە ئەنجوومەنی نوێنەرانی عێراق دەركراوە.

راشیگەیاند: بەگوێرەی بڕیارەكە نەك تەنیا مامۆستا و فەرمانبەرانی سەر بە وەزارەتی پەروەردە، بەڵكو دەبێت سەرجەم فەرمانبەرانی حكوومەت پشكنینی ماددەی هۆشبەر ئەنجام بدەن.

لەلایەكی دیكەوە بەشێك لە چالاكوانان ئاشكرای دەكەن كە لەنێو حكوومەتی عێراق بەرپرسی باڵا و لایەنی جێبەجێكار هەن مامەڵە و بازرگانی بە ماددەی هۆشبەر دەكەن، هەروەها بەم دواییانە حاڵەتی زۆر لەنێو قوتابخانە و ناوەندەكانی خوێندنیش بینراوە و دەستگیركراون.  

ئاماژە بەوەش دەكەن كە نەبوونی سزایەكی قورس بەرامبەر بازرگانانی ماددەی هۆشبەر، وای كردووە رۆژ بەرۆژ بەكارهێنان و فرۆشتنی ئەم ماددانە لە عێراق روو لە زیادبوون بكەن.

یاسر ئەلحوسێنی ئەندامی لیژنەی رووبەڕووبوونەوەی ماددەی هۆشبەر لە ئەنجوومەنی نوێنەرانی عێراق لەمبارەیەوە دەڵێت: بەرپرس و فەرماندەی باڵا هەن تێوەگڵاون بە بەكارهێنان و بازرگانیكردنی ماددەی هۆشبەر بە ئامانجی دەستكەوتی سیاسی و ماددی، هەندێك جاریش بە مەبەست ئەم كار دەكەن بۆ لاوازكردنی كۆمەڵگەی عێراقی.

هەروەها دەڵێت: ئێستا وای لێ هاتووە هەڕەشەی بڵاوبوونەوەی ماددەی هۆشبەر لە عێراق گەیشتۆتە ئاستێك یەكسان بووە لەگەڵ هەڕەشەی تیرۆر.

ئەندامەكەی پەرلەمان داوای لە حكوومەتی عێراق كرد پلانەكانی بۆ رووبەڕووبوونەوەی ماددەی هۆشبەر بگۆڕێت و بەدوای یاریكەرە گەورە و بازرگانە سەرەكییەكان بگەڕێت نەك ناوەناوە بازرگانێكی بچووكی ماددەی هۆشبەر بگرێت و بیكاتە دەستكەوت.

بەم دواییانەش وەزارەتی ناوخۆی عێراق پێنج ناوەندی دیكەی چارەسەری تووشبووانی ماددەی هۆشبەری لە بەغدا و پارێزگاكانی دیكە كردەوە، ئێستاش كار لەسەر كردنەوەی گەورەترین بنكە لە دەشتی نەینەوا دەكرێت.