سەرۆكی هەڵبژێردراوی ئەمەریكا ئاشكرای كرد كە ئامادەكاری دەكەن بۆ دیدار و چاوپێكەوتن لەگەڵ سەرۆكی رووسیا بۆ كۆتاهێنان بە جەنگی ئۆكڕاینا كە ماوەی زیاتر لە دوو ساڵە درێژەی هەیە.
دۆناڵد ترەمپ سەرۆكی هەڵبژێردراوی ئەمەریكا دوێنێ پێنجشەممە لە میانەی كۆبوونەوەیەكدا لەگەڵ كۆمەڵێك حاكمی كۆمارییەكان لە باڵم بیچ لە ویلایەتی فلۆریدا گوتی: فلادیمیر پووتین سەرۆكی ئەمەریكا ئامادەیی دەربڕیوە بۆ دیدار و كۆبوونەوە و ئەمەشی بە ئاشكرا راگەیاندووە، بۆیە ئێشمەش ئامادەین بۆ ئەو كۆبوونەوەیە چاوەڕوانكراوە.
گوتیشی: پێویستە بەزووترین كات جەنگ و خوێنڕشتن لە ئۆكڕاینا كۆتایی پێ بێت.
دۆناڵد ترەمپ كات و وادەی ئەنجامدانی كۆبوونەوە چاوەڕوانكراوەكەی لەگەڵ پووتین ئاشكرا نەكرد، بەڵام بەدڵنیاییەوە دوای 20ی مانگ دەبێت كاتێك بەفەرمی وەك سەرۆكی نوێی ئەمەریكا دەستبەكار دەبێت.
لەوەتەی جەنگی ئۆكڕاینا لە ساڵی 2022 دەستی پێ كردووە، جۆ بایدن سەرۆكی ئەمەریكا بڕی زیاتر لە 175 ملیار دۆلاری وەك هاوكاری پێشكەش بە ئۆكڕاینا كردووە.
هەر دوێنێ پێنجشەممە دیمیتری پیسكۆف گوتەبێژی كرملین رایگەیاندبوو كە پووتین پێشوازی لە ئەنجامدانی هەر پەیوەندییەك لەگەڵ ترەمپ دەكات، بۆ ئەم مەبەستەش چاوەڕێی دەستبەكاربوونی سەرۆكی نوێی ئەمەریكا دەكەن.
لای خۆشییەوە فۆلۆدیمیر زیلینسكی سەرۆكی ئۆكڕاینا پێشتر ئاماژەی بەوە دابوو كە ترەمپ دەتوانێت رۆلی یەكلاكەرەوە ببینێت لە راگرتنی جەنگ كە ماوەی 34 مانگە بەردەوامە.
کۆمێنت (0)
تا ئێستا هیچ کۆمێنتێک نەکراوە.