ئەمڕۆ پێنجشەممە 19ی کانوونی یەکەمی 2024 لە سەلاحەددین، سەرۆک مەسعود بارزانی پێشوازی لە دکتۆر محەمەد ئەلحسسان نوێنەری تایبەتی سکرتێری گشتییی ڕێکخراوی نەتەوەیەکگرتووەکان لە عێراق و شاندی یاوەری کرد.
لەم دیدارەدا باس لە هەنگاوەکان و دیالۆگی نێوان لایەنە سیاسییەکانی هەرێمی کوردستان کرا بۆ پێکهێنانی کابینەی نوێی حکوومەتی هەرێم و جەخت لەسەر پێویستیی پێکهێنانی کابینەی تازە و دەستبەکاربوونی لەم دۆخە سیاسییە هەستیارەی لە ئارادایە کرایەوە.
هەر لەم دیدارەدا ڕۆشنایی خرایە سەر پێشهات و گۆڕانکارییەکانی سووریا و ناوچەکە بە گشتی و باس لە مەترسیی سەرهەڵدانەوەی تیرۆر و بیری توندڕۆیی کرایەوە و ئەگەری دزەکردنی تیرۆرستان لە سووریا بە مەترسییەکی جددی دانرا کە کاریگەری بۆ سەر عێراق و ناوچەکە بە گشتیی دەبێت، هەر پەیوەست بەم باسەوە هەماهەنگیی ئەمنیی نێوان حکوومەتی هەرێمی کوردستان و حکوومەتی عێراقی فیدڕال بە گرینگ زانرا.
هەردوولا هیوایان خواست دۆخی سووریا ئارامی و سەقامگیری بەخۆیەوە ببینێت و کێشە و گۆڕانکارییەکان بە دیالۆگ و لێکتێگەیشتن لە بەرژەوەندیی گەلانی سووریا بگات بە چارەسەر.
کۆمێنت (0)
تا ئێستا هیچ کۆمێنتێک نەکراوە.