ئەندامی مەكتەبی سیاسی پارتی دیموكراتی كوردستان رایگەیاند، ئەوان وەك پارتی سەردانیكردنی لایەنەكانیان بۆ پێكهێنانی حكوومەتی نوێ دەست پێ كردووە، جەختیشی كردەوە كە مەسرور بارزانی سەرۆكی كابینەی دەیەمی حكوومەتی هەرێمی كوردستانە بەو پێیەی پارتی براوەی یەكەمی هەڵبژاردنە.
هێمن هەورامی ئەندامی مەكتەبی سیاسیی پارتی دیموكراتی كوردستان ڕایگەیاند: پارتی لەسەر بنەمای شاییستەی هەڵبژاردن دەرگای كراوەیە و بەبێ بوونی ڤیتۆ، سەردانی هەموو لایەنە سیاسییەكان دەكا.
راشیگەیاند: خەڵكی كوردستان بۆیە بەشدارییەكی كارای كردووە بۆ ئەوەی لە زووترین كاتدا كابینەی دەیەم دروست بێ.
هەروەها گوتی: سیاسەت واقیعبینییە، هەڵبژاردنێك كراوە و ڕوونە خەڵك دەنگی چۆن داوە، ئێمە پابەندی یاسایی دەبین كە رۆژی 2ی مانگی داهاتوو وادەی دانیشتنی خولی شەشەمە بۆ ئەوەی كاندیدە دەرچووەكان سوێندی یاسایی بخۆن.
هێمن هەورامی ئاماژەشی دا: هیواخوازین بتوانین تا ئەو كاتە بگەینە رێككەوتن و بە یەك پاكێج هەم سەرۆكایەتیی پەرلەمان هەڵبژێرێ بۆ ئەوەی دوای ئەوە هەنگاوەكانی هەڵبژاردنی سەرۆكی هەرێم و دواتر سەرۆكی هەرێم كەسی ناوزدەكراو ڕاسپێرێ بۆ پێكهێنانی كابینەی دەیەم.
ئەندامەكەی مەكتەبی سیاسیی پارتی جەختیشی كردەوە كە مەسرور بارزانی سەرۆكی كابینەی دەیەمی حكوومەتی هەرێمی كوردستانە، بەو پێیەی پارتی براوەی یەكەمی هەڵبژاردنە.
لە هەڵبژاردنی خولی شەشەمی پەرلەمانی كوردستان كە رێژەی بەشداریكردن 72% بوو، پارتی دیموكراتی كوردستان براوەی یەكەمی هەڵبژاردن بوو بە بەدەستهێنانی 809.197 دەنگ كە دەكاتە رێژەی 39 كورسی پەرلەمان.
کۆمێنت (0)
تا ئێستا هیچ کۆمێنتێک نەکراوە.