ئیسرائیل زنجیرەیەک هێرشی ئاسمانی کردە سەر بەیروت

سوپای ئیسرائیل زنجیرەیەک هێرشی ئاسمانی کردە سەر ناوچەی زاحییە لە باشووری بەیروت'ی پایتەختی لوبنان.

ئاژانسی هەواڵی فەرمی لوبنان، (NNA) بڵاوی کردەوە کە هێرشی ئەمڕۆی ئیسرائیل بۆ سەر گەڕەکی حەدەس، شیاە و بورج ئەلبەراجینە لە ناوچەی زاحییە بووە.

لە هێرشی ئیسرائیل بۆ سەر گەڕەکی حەدەس، دەوروبەری نەخۆشخانەی جۆرج بۆردومان کراوە.

هێرشی سوپای ئیسرائیل بۆ سەر گەڕەکی شیاه بووە هۆی ڕووخانی تەواوی باڵەخانەیەکی 12 نهۆمی.

بە هۆی هێرشەکەوە دووکەڵ و تۆزێکی زۆر باڵی بەسەر شارەکە داکێشاوە و بەشێکی زۆر لە باڵەخانەکانی ناوچەکە زیانیان پێ گەیشتووە.

تا ئێستا لەبارەی زیانی گیانی و ماددی هێرشەکەوە هیچ زانیارییەکی فەرمی بڵاو نەکراوەتەوە.

پێشتر گوتەبێژی سوپای ئیسرائیل، دانیاڵ هاگاری بە ڕێگەی تۆڕی کۆمەڵایەتی X، دوو نەخشەی وەک هەڕەشەی ئەنجامدانی هێرش بڵاو کردبوویەوە.

هاگاری ئاماژەی بەوە دابوو کە ئەو ناوچانە دامودەزگاکانی حزبوڵڵای لوبنانی لێیە و داوای کردبوو خەڵکەکە بەلایەنی کەم 500 مەتر خۆیان لەو ناوچانە بە دوور بگرن.

سوپای ئیسرائیل ڕۆژی ڕابردوو لە ڕاگەیاندراوێکدا ئاشکرای کردبوو کە لە میانی یەک هەفتەدا 50 هێرشی ئاسمانیان کردووەتە سەر بەیروت'ی پایتەختی لوبنان.