سەرۆكایەتی هەرێمی كوردستان زانیاری لەبارەی سەردانەكەی ئەمڕۆی سەرۆكی هەرێمی كوردستان بۆ باكۆی پایتەختی ئازەربایجان بڵاو كردەوە.
دلشاد شەهاب گوتەبێژی سەرۆكایەتیی هەرێمی كوردستان ڕایگەیاند: ئه‌مڕۆ دووشه‌ممه 2024/11/11 نێچیرڤان بارزانی سه‌رۆکی هه‌رێمی کوردستان لەسەر بانگهێشتی فەرمیی ئیلهام ئەلیێڤ سەرۆكی ئازەربایجان، بە مەبەستی بەشداریكردن لە كۆنفرانسی نەتەوەیەكگرتووەكان بۆ گۆڕانی ئاو و هەوا (COP29) بەرەو باکوی پایتەختی ئازەربایجان، بەڕێ دەكەوێت.
هه‌روه‌ها ڕایگه‌یاند: نێچیرڤان بارزانی شان بە شانی سەرۆك و سەركردەكانی جیهان، سبەی سێشه‌ممه بەشداریی لە ڕێوڕەسمی كردنەوەی كۆنفرانسەكەدا دەكات که بۆ گفتوگۆكردن لەسەر ئاستەنگەكانی ژینگە و كێشە و لێکه‌وته‌كانی گۆڕانی ئاو و هه‌وا به‌ڕێوه ده‌چێت.
لە كۆنفڕانسی جیهانی ئەمساڵی كەشوهەوا تاوتوێی چەند بابەتێكی گرینگی تایبەت بە كەشوهەوا دەكرێت، لەوانە پیسبوونی ئاو و هەوا، وشكەساڵی، گەرمبوونی گۆی زەوی، دەردانی گازی ژەهراوی، تەندروستی و كشتوكاڵ و هەروەها پێشكەشكردنی هاوكاری دارایی بۆ ئەو وڵاتانەی بەدەست كێشەی گۆڕانكارییەكانی ئاو و هەوا و هەژارییەوە دەناڵێنن.
کۆمێنت (0)
تا ئێستا هیچ کۆمێنتێک نەکراوە.