پێشنيوه‌ڕۆى ئه‌مڕۆ چوارشه‌ممه 2024/10/30 نێچيرڤان بارزانى، سه‌رۆكى هه‌رێمى كوردستان، پێشوازیی له خاتوو جانێت ئالبێردا باڵيۆزى نوێى شانشينى هۆڵه‌ندا له عێراق، كرد.
له کۆبوونه‌وه‌یه‌کدا نێچيرڤان بارزانى، وێڕاى پيرۆزبايى بۆ ده‌ستبه‌كاربوونى، هيواى سه‌ركه‌وتنى بۆ خواست و هه‌موو پشتگيرييه‌كى لايه‌نه په‌يوه‌نديداره‌كانى هه‌رێمى كوردستانى بۆ سه‌رخستنى ئه‌ركه‌كه‌ى، دووپات كرده‌وه.
لاى خۆيه‌وه خاتوو ئالبێردا خۆشحاڵيى خۆى به سەردانەکەی و ده‌ستبه‌كاربوونی لە هه‌رێمى كوردستان نيشان دا، هەروەها پيرۆزباييى سه‌ركه‌وتنى هه‌ڵبژاردنى په‌رله‌مانى كوردستانى له نێچيرڤان بارزانى و گه‌لى كوردستان، كرد.
هه‌ردوولا جه‌ختیان له خواستى دوولايه‌نه بۆ بره‌ودان بە په‌يوه‌ندييه‌كانى هۆڵه‌ندا له‌گه‌ڵ عێراق و هه‌رێمى كوردستان و فراوانكردنى هاريكاريى هاوبه‌شى نێوانيان له بواره جياكاندا، كرده‌وه و ستايشى ڕۆڵى هۆڵه‌ندا له هاوپه‌يمانيى نێوده‌ڵه‌تيى دژى داعشدا و هاوكارييه‌كانى بۆ عێراق و هه‌رێمى كوردستان، كرا.
په‌يوه‌ندييه‌كانى هه‌ولێر ـ به‌غدا، دوايين پێشهاته‌كانى دۆخى ئاڵۆزى ڕۆژهه‌ڵاتى ناوه‌ڕاست و مه‌ترسى و ئه‌گه‌رى لێكه‌وته‌كانى به‌سه‌ر ئاسايش و سه‌قامگيريى ناوچه‌كه‌وه، ته‌وه‌رێكى ديكه‌ى کۆبوونه‌وه‌که بوو.
کۆمێنت (0)
تا ئێستا هیچ کۆمێنتێک نەکراوە.