سه‌ر له‌به‌یانیی ئه‌مڕۆ پێنجشه‌ممه 17/10/2024، نێچیرڤان بارزانی، سه‌رۆكی هه‌رێمی كوردستان، به‌شداریی له ڕێوڕه‌سمی بیست و نۆیه‌مین خولی ده‌رچووانی پێگه‌یاندنی كۆلێژی سه‌ربازیی دوویزاخۆدا كرد كه ژماره‌یه‌ك له به‌رپرسانی حكوومه‌تی هه‌رێمی كوردستان وحزب و لایه‌نه‌كان و فه‌رمانده و ئه‌فسه‌ر و مامۆستایانی كۆلێژی سه‌ربازیو كه‌سوكاری قوتابیان تێیدا ئاماده بوون.
له ڕێوڕه‌سمه‌كه‌دا دوای نمایشی سه‌ربازیی ده‌رچووان،نێچیرڤان بارزانی وتارێکی پێشكه‌ش كرد، ئه‌مه ده‌قه‌كه‌یه‌تی:
سه‌رله‌به‌یانیی ئه‌مڕۆ پێنجشه‌ممه 17/10/2024، نێچیرڤان بارزانی، سه‌رۆكی هه‌رێمی كوردستان، به‌شداری له ڕێوڕه‌سمی بیست و نۆیه‌مین خولی ده‌رچووانی پێگه‌یاندنی كۆلێژی سه‌ربازیی دوو ی زاخۆ كرد كه ژماره‌یه‌ك له به‌رپرسانی حكوومه‌تی هه‌رێمی كوردستان و حزب و لایه‌نه‌كان و فه‌رمانده و ئه‌فسه‌ر و مامۆستایانی كۆلێژی سه‌ربازی و كه‌س و كاری قوتابیان تێیدا ئاماده بوون.
له ڕێوڕه‌سمه‌كه‌دا دوای نمایشی سه‌ربازیی ده‌رچووان، سه‌رۆك نێچیرڤان بارزانی وته‌یه‌كی پێشكه‌ش كرد، ئه‌مه ده‌قه‌كه‌یه‌تی:
ده‌رچوويێت خۆشتڤى،
ئاماده‌بوويێت هێژا،
ڕۆژ باش.. هوين هه‌مى گه‌له‌ك ب خێر هاتن سەرچاڤا..
گه‌له‌ك خۆشحالم كو دگه‌ل هه‌وه‌يێن ڕێزدار، به‌شدارييا ده‌رچوونا خولا (29)ێ يا پێگه‌هاندنا كۆلێژا سه‌ربازى يا دو يا زاخۆ دكه‌م. ئه‌ڤ ديمه‌نه بۆ مه و بۆ هه‌مى خه‌لكێ كوردستانێ، جهێ شانازيێيه كو (792) ئه‌فسه‌رێت مه يێت گه‌نج، خويندنا خۆ يا سه‌ربازى، يا ئه‌كاديمى و پراكتيكى بدويماهى تينن.
جهێ ده‌ستخۆشى و سه‌ربلندييه‌كا مهزنه، پشتى كو هه‌وه خويندنا خۆيا زانكۆيى بدويماهى ئيناى، هوين ب خواست و ڤيانا خۆ هاتى، داكو خويندنا سه‌ربازى ژى بدويماهى بينن و ببنه ئه‌فسه‌رێت پێشمه‌رگه‌ى. ئه‌ڤ ناڤ نيشانێ حه‌زكرن و دلسۆزييا هه‌وه بۆ خزمه‌تێ و بۆ كوردستانێ نیشا ددەت. هه‌ر بژين، هه‌ر سه‌ركه‌فتى بن.
يا زێده جهێ خۆشحاليێ، دناڤ ڤان دەرچوویادا، (50) كچێت كوردستانێ، (13) ئێزدى و ده‌رچوويه‌كێ كاكه‌يى هه‌نه. ئه‌ڤه دلخۆشييەكا مه هه‌ميانه. ب گه‌رمى و ب دل پيرۆزباهيێ ل هه‌وه هه‌ميا دكەم، ل مالبات و كه‌سوكارێت هه‌وه دكه‌م كو ئەڤرۆ د ڤێ مەراسیمێدا دگەل مە بەشدارن، پیرۆز بیت ل وان، پیرۆز بیت ل هەوە، هیڤییا سەركەفتنێ بۆ وە دخوازم.
ئەز ژی دگەل مالباتێت هەوە ئەڤرۆ ڤێ ئاهەنگێ دگێڕین و پر ب دل شانازیێ ب وە دكەم، ئەو شانازییا كو مالباتێت وە ب هەوە دكەن، ئەز ژی ل جهێ خۆ شانازیێ ب هنگۆ دكەم و ب ئانەهییا خودێ هەر سەركەفتی و سه‌رفه‌راز بن و د ژیانا خۆ دا.
من دڤێت ئەز تشتەكێ ژی ببێژم، دناڤ مەدا ئەڤرۆ كەسەك ئامادەیە كو وەكی باب یێ بەشدارە د ڤێ مەراسیمێدا، ئەو ژی فەرماندەیەكێ مە بوو كو خزمەتەكا مەزن یا كوردستانێ كر و مخابن ل شەڕێ ئازادییا عێراقێ بریندار بوو، ئەم هەمی پێكڤە بە چەپلەیەكی بخێرهاتنێ ب وەجی بارزانی دكەین كو دگەل مە یێ بەشدارە.
ئەز ژی وەكی مالبات چەوا مالباتا وە ئەڤرۆ لێرە د ئامادەنە ئێك ب ئێك یێت هنگۆ شانازیێ ب هنگۆ دكەن، ئەز ژی وەكی مالبات دێ بێژمێ، مام ئەم شانازیێ ب تە دكەین چونكی ئێك ل وان قوتابیی یێت دەرچوو ئەڤرۆ لێرە هەی كوڕێ وی یە و كوڕێ خۆ یێ پەروەردە كری و یێ فێر كری كو ئەو ژی لسەر ڤێ ڕێكێ یێ بەردەوام بیت، ئەو ڕێكا كو بابێ وی گرتی و تێدا بۆ ئازادییا عێراقێ و سەرفەرازییا مللەتێ مە بریندار بووی، كوڕێ خۆ ژی یێ پەروەردە كری كو لسەر وێ ڕێكێ یێ بەردەوام بیت، هنگ هەمی ڤێكڕا تەمەندرێژ و سه‌رفه‌رزان و سەركەفتی بن و مامێ وەجی تو ژی گەلەك بخێرهاتی سەرچاڤا و سەر سەرا و یێ پشتڕاست بە كو ماندیبوونا تە بۆ خزمەتا لەشكرێ كوردستانێ، ئەو ماندیبوونا تە كری هەمی گاڤا وەكی بەرپەڕەكێ زێڕین دێ ل خەباتا پێشمەرگایەتیێ و كوردستانێ هێتە نڤێسین و ئەم هەمی شانازیێ ب تە دكەین و هیڤیا سەركەفتنێ بۆ هەوە هەمیا دخوازم. هیڤیدارم جارا بهێت ژمارا ئافرەتا د ڤان خولادا زێدەتر ببیت.
گه‌لى ده‌رچوويێت هێژا،
ژ ڕۆژا كو هه‌يه و هه‌تا ئه‌ڤرۆ، پێشمه‌رگايه‌تى جهێ شانازى و شه‌ره‌فمه‌نديێ و به‌رپرسياريه‌تییەكا مه‌زن بوويه. ژ ڕۆژا كو ناڤێ پێشمه‌رگه‌ى هه‌يه و هه‌تا ئه‌ڤرۆ، باوه‌رييا كورد و كوردستانێ بخۆ، ب دۆزا خۆ و ب مافێت خۆ يێت ڕه‌وا، هه‌ر موكوم و ڕۆژ ب ڕۆژ ژی موكومتر كریە.
پێشمه‌رگايه‌تى، ئه‌ركه‌كێ گه‌له‌كێ پيرۆزه، به‌شه‌كێ گرنگ يێ ناسناما نيشتمانى و یا نه‌ته‌وه‌يى يا كوردستانێ يه. به‌رده‌وامييا كاروانه‌كێ دوير و درێژێ خه‌بات و تێكۆشينێيه بۆ پاراستنا مللەتێ مە، بۆ پاراستنا كوردستانییا. ژبه‌ر هندێ ژى، ده‌رچوونا هه‌وه يا ئه‌ڤرۆ، سه‌ركه‌فتن و بدويماهى ئينانا خويندنێ، دويماهيا ڕێكێ نييه.
نه‌خێر،
ئه‌ڤرۆ، ئەو تشتێ ئەڤرۆ هنگ دەسپێدكەن، خزمه‌ت و ئه‌ركێ هه‌وه يێ نوييه دگه‌ل دامودەزگەهێت حكوومەتێ بۆ كوردستانێ. ئه‌ڤ ئه‌ركه بۆ هەوە و بۆ مە هەمییا شانازییەكا مەزنە. هه‌ياما (9) هه‌يڤێت چوويى يێت مه‌شق و ڕاهێنان و فێربوونێ، هه‌وه ئه‌زموونه‌كا ده‌وڵه‌مه‌ند وه‌رگرت، داكو ئه‌ڤرۆ بشێن خزمه‌تا وه‌لاتێ خۆ بكه‌ن.
باوه‌ڕ‌ناما هه‌وه، هه‌ر بتنێ ده‌سكه‌فته‌كێ ئه‌كاديمى نييه، په‌يمانا شه‌ره‌فمه‌نديێ و سيمبۆلا دلسۆزیێ و وه‌فاداريێ و ئه‌مانه‌ته‌كێ مهزنه بۆ خزمه‌تا ملله‌تێ خۆ و بۆ خزمەتا وه‌لاتێ خۆ. نيشانێ ئاماده‌يى و حازرييا هه‌وه‌يه بۆ هه‌ر قوربانيدانه‌كێ د ڕێكا وەلاتیدا.
د ديرۆكا بزاڤا ڕزگاريخازا گه‌لێ كوردستانێدا، پێشمه‌رگەی قوربانى يێت گه‌له‌ك مه‌زن دانه. ب هێزا پێشمەرگا، ڕوحا خۆڕاگری، خوینا خۆ دایە و ڕوحا بەرخۆدانێ بەرجەستە كرییە، داكو هەمی جارا به‌ره‌ڤانيێ ل ئاخا كوردستانێ، ل دۆزا ملله‌تێ خۆ بكه‌ن. هەمی دیرۆكا پێشمەرگاتیێ قەهرەمانی و مێرخاسی و قوربانیدانێت مەزن بۆ ئازادیێ و بۆ شكۆمەندییا كوردستانێ، سه‌رێ خۆ يێ داناى، به‌لێ هیچ وەختەكی خۆ بۆ دوژمنى نه‌چه‌ماندييه.
ڤێ دويماهيێ كو مه‌زنترين ڕێكخراوا تيرۆریستی ل جيهانێ ب سه‌ر عێراقێ و كوردستانێدا گرتى، پێشمه‌رگه بوو ل به‌رۆكێت شه‌ڕى، ب گيانێ خۆ و خەباتا خۆ، ئه‌فسانه‌يا داعشێ تێكشكاندى. ڕێ نه‌دا كوردستان بكه‌ڤيته ده‌ستێ تيرۆرستا. له‌وما، هندى كورد و كوردستان هه‌بن، پێشمه‌رگه دێ هه‌ر مينيت ئيلهامبه‌خش و پارێزڤانێ گه‌لێ كوردستانێ و دێ مینیت سيمبۆلا خۆڕاگرى و به‌رخودانێ. لێرەدا ئەم بەژنا خۆ دچەمینین بۆ خوینا وان شەهیدا، ئەوێت كو د ڤێ ڕێكێدا خەبات كری و گیانێ خۆ كرییە قوربانی.
د ڤێ هه‌لكه‌فتنێدا، من دڤێت جاره‌كا دى، سوپاس و پێزانينێت هه‌رێما كوردستانێ بگه‌هينمه هێزێت هه‌ڤپه‌يمانييا نێڤده‌وله‌تى كو د شه‌ڕێ داعشێدا پشته‌ڤانييا پێشمه‌رگا كر. هاريكاريا وان بۆ پێشمه‌رگا و هەروەستا هاریكارییا وان بۆ سوپايێ عێراقێ، يا ستراتيژى و یا ئێكلاكه‌رەڤە بوو. نموونه‌كێ زندى يێ هاريكارييا نێڤده‌وله‌تى بوو، بۆ به‌رهنگارييا ئەو ته‌حه‌دا يێت مەزنێت هه‌ڤپشك كو هاتنە د ڕێكا مەدا.
هه‌روه‌سا گرنگه به‌حسێ هه‌ماهه‌نگى و هاريكارييا ناڤبه‌را پێشمه‌رگا و هێزێت سوپايێ عيراقی بكەین به‌رامبه‌رى تيرۆرستا. ب تایبەتی ئەو كارێ پێكڤە یێ كو مە هەردوولایا پێشمەرگە و سوپایێ عێراقێ هێزێت حەشدا شەعبی ڤێكڕا كری بتايبه‌تى ل ده‌ڤه‌رێت ماده‌يا (140)، كو جهەكە مە ڤێكڕا كار كر دگەل سوپایێ عێراقێ بۆ بەرقەراركرنا ئاسایشێ و ئارامیێ و تەناهیێ. هەر ئەڤرۆ و د ڤێ هەلكەفێدا جارەكا دی ئەم سەرێ ڕێزێ بۆ خوینا وان شەهیدا دچەمینین ئەوێت كو د بەرگریكردن ل عێراقێ گیانێ خۆ فیدا كری چ سوپایێ عێراقێ بیت، چ حەشدا شەعبی بیت و چ پێشمەرگە بن. ب باوەرییا مە داعش هێشتا داعش گه‌ف و مه‌ترسييه‌كا جددييه لسه‌ر ئاسايش و ئێمناهييا عێراقێ و ڤێ ده‌ڤه‌رێ.
ژبه‌ر هندێ گه‌له‌ك گرنگە و گەلەك ژی پێدڤييه هاريكارييا به‌رده‌وام هەبيت دناڤبەرا سوپایێ عێراقێ و هێزێت پێشمەرگەیدا، دڤێت ئەڤ كاریكاری و هەڤكاری بەردەوام بیت و بلا بیرا مە بهێت كو مە هەمییا ڤێكڕا خوین یا دای بۆ بەرگریكرنێ ل عێراق و كوردستانێ. ئەز هیڤیدارم ئەڤ هاریكارییا بەردەواما مە، ئەنجامێ وێ تەناهییەكا سەرتاسەری بیت بۆ عێراقێ و پاشەڕۆژەكا گەش بۆ عێراقێ و بۆ كوردستانێ و بۆ هەمی خەلكێ كو ل عێراقێ دژین. پێشمه‌رگه به‌شه‌كه ژ سيسته‌مێ عێراقێ يێ به‌ڕه‌ڤانيێ، له‌وما چاڤەڕێ تێتە كرن عێراق ئەركێ خۆ یێ یاسایی ل بەرامبەر پێشمەرگەی جی بجی بكەت و پشتەڤان بیت و چه‌كداركرنا پێشمه‌رگه‌ى، جێبه‌جێ بكه‌ت. پێشمەرگە مەترسی نییە، پێشمەرگە بەرگریكارە ل عێراقێ و ل كوردستانێ و ل مرۆڤایەتیێ.
سوپاس و پێزانين و ده‌ستخۆشى بۆ هێزێت ئه‌مه‌ريكا و دۆستێت مه يێت دى يێت هه‌ڤپه‌يمانييا نێڤده‌وله‌تى، بۆ پشتگيرييا وان يا به‌رده‌وام ل پرۆسا چاكسازيێ يا وهزارهتا كاروبارێت پێشمه‌رگه‌ى بۆ ڕێكخستنه‌ڤه و ئێككرنا هێزێت پێشمه‌رگه‌ى.
ئه‌ڤ پرۆسه‌‌یە نه وه‌كى مه دڤێت، و نە وەكی وان دڤێت، لدويڤ تمووحێت مهنییە. كێشه يێت هه‌ى و هێدى يا بڕێڤه دچيت. پێدڤييه ئه‌م هه‌مى لايه‌ك كاره‌كێ جددى بكه‌ين و ڤێ پرۆسێ سه‌ربێخين. چێنابيت ئه‌م دۆست و هه‌ڤپه‌يمانێت خۆ كو ب جددی كار دكەن بۆ ئێكگرتنا هێزێت پێشمەرگەی، بێ ئومێد بكه‌ين.
بۆ ڤێ چه‌ندێ، پەیاما من بۆ دۆستێت مە یێت هەڤپەیمان ئەڤەیە، ئەم دێ بێژینە وان ڕاستە ئەڤ پرۆسە یا هێدی بڕێڤە دچیت، بەلێ ئیرادەكا جددی مە یا هەی بۆ هندێ هێزێت پێشمەرگە بكەینە هێزەكا نیشتمانی یا كوردستانی و مە دێ ئێك هێز هەبیت و ئێك وەزارەت دێ هەبیت و ئێك سەركردایەتی دێ هەبیت بۆ بڕێڤەبرنا پێشمەرگەی. گاڤ ب گاڤ دێ هه‌مى ئاسته‌نگ و ئاريشا چاره‌سه‌ر كه‌ين، هه‌تا ب ئانەهیا خودێ دگه‌هيته دويماهيیا ڤێ پرۆسێ.
ئه‌م بدروستى پابه‌ندين كو له‌شكره‌كێ ئێكگرتى يێ پێشمه‌رگه‌ى هه‌بيت. له‌شكره‌كێ نيشتمانى بيت كو دبن ڕێڤه‌به‌رى و كۆنترۆلا حكوومەتا هەرێما كوردستانێ و وهزارهتا پێشمه‌رگه‌ى دا بيت.
ده‌رچوويێت هێژا،
ژبير نه‌كه‌ن، كۆلێژا سه‌ربازى يا زاخۆ، هوين يێت په‌روه‌رده كرى و پێگه‌هاندى، داكو وه‌كى فه‌رماندێت زانا و خودان شيان، دگه‌ل پاراستنا كوردستانێ، دادپه‌روه‌ريێ و مرۆڤاهيێ ژى بپارێزن. پره‌نسيپ و ڕه‌وشتێت بلند یێتنيشتمانپه‌ره‌وریێ، قوربانيدان و ديسپلين، ئه‌و بنه‌مايێت سه‌ره‌كينه كو پێدڤييه هه‌رگاڤ د هزر و دلێ وه‌دا بمينن و بەردەوام بیر ل ڤان پرەنسیپا بكەنەڤە.
ب خويندن و په‌روه‌رده و فێربوونا هه‌وه ل ڤێ كۆلێژا سه‌ربازى، ب وانه‌يێت وه‌لاتپارێزى و دلسۆزيێ بۆ ئه‌ركێ خۆ و بۆ ئاخا خۆ، نه هه‌ر دناڤ ڕێزێت پێشمه‌رگه‌يدا، هوين د ناڤ هه‌مى جڤاكێدا، دشێن ڕۆله‌كێ جدا و گرنگ بگێڕن. هون دشێن ببنه نموونه و ئيلهامبه‌خشێت نڤشێت داهاتى، بۆ پاشه‌ڕۆژه‌كا باشتر.
ڕۆلێ هه‌وه نه بتنێ يێ مه‌يدان و قادێت شه‌ڕييه، به‌لكى ئه‌ركێ هه‌وه دڤێت مه‌زنتر بیت بۆ ئاڤاكرنا جڤاكه‌كا ئارام و ته‌نا بيت. هه‌روه‌سا به‌ر‌پرسيارييه‌كا هه‌وه يا دى، ئه‌وه كو به‌هايێت ديموكراسیێ و مافێت مرۆڤى بپارێزن. كار بكه‌ن داكو گرنگييا ڤا به‌هايا دناڤ جڤاكێدا زێدەتر به‌لاڤ ببيت. هون ببنه نموونه‌يه‌ك بۆ پاراستنا دادپه‌روه‌ریێ و پێكڤەبوونێ و به‌ڕه‌ڤانيێ ل مافێت هەمی هه‌ڤوه‌لاتی یێت هەرێما كوردستانێ.
مه هه‌ميا باوه‌رى يا ب هه‌وه هه‌ى كو دێ شێن به‌رامبه‌ر ته‌حه‌ديا ڕاوه‌ستن و د ئه‌ركێ خۆدا سه‌ركه‌ڤن، داكو ب باشترين شێوه خزمه‌تا وەلاتێ خۆ بكه‌ن. داكو د چارچۆڤه‌يا وهزارهتا كاروبارێت پێشمه‌رگه‌يدا، هێزا نيشتمانييا كوردستانێ بن. چ جارا نه‌بنه ته‌ره‌ف، د كێشه و ناكۆكى يێت سياسيدا.
ئاماده‌بوويێت هێژا،
هه‌ر د ڤێ ده‌ليڤێدا، ده‌رباره‌ى ڕه‌وشا ئالۆز يا ڕۆژهه‌تا ناڤين، من دڤێت ته‌ئكيدێ لسه‌ر هه‌لوێستا هه‌رێما كوردستانێ بكه‌م كو ئه‌م دگه‌ل ڕاوه‌ستيانا شه‌ڕى و چاره‌سه‌ركرنا ئاشتيانەینە يا هه‌مى كێشه و ئاريشان. مه ب هيچ ڕه‌نگه‌كى نه‌ڤێت هه‌رێما كوردستانێ و عێراق، بكه‌ڤنه ناڤ ڤان ئالۆزييا. دڤێت هه‌مى هه‌ول بێنه دان، داكو ڕه‌وش ئالۆزتر نه‌بێت.
ل دويماهيێ، سوپاس و پێزانين و ده‌ستخۆشييه‌كا تايبه‌ت بۆ مامۆستا و به‌ر‌پرسيار و ڕێڤه‌به‌رێت كۆلێژا سه‌ربازى يا دو يا زاخۆ. كار و خزمه‌ت و مانديبوونا وان، جهێ ڕێزه‌كا مهزنه. ئه‌ركێ وان پيرۆزه و ڕۆلێ وان گه‌له‌كێ گرنگه بۆ باشتركرن و به‌ره‌ڤپێشبرنا ئه‌ركێ پێشمه‌رگه‌ى، بۆ پێگه‌هاندنا نڤشه‌كێ وه‌لاتپارێز لسه‌ر بنه‌مايێ زانستێت سه‌ربازى و ئينتيما و ڤيانا وه‌لاتى.
ئه‌رك و خزمه‌تا كو هوين دكه‌ن، ئاڤاكرنا كۆلێژ و ئه‌كاديمى يێت سه‌ربازى، باشترين وه‌فادارييه بۆ خه‌بات و قوربانيدان و ڕۆلێ ديرۆكى يێ پێشمه‌رگا، بۆ هندێ دا پشتڕاست ببن كو پاشه‌ڕۆژا پێشمه‌رگا دێ يا باشتر بيت.
سلاڤ و ڕێز و دروود بۆ گيانێ پاقژێ هه‌مى شه‌هيدا، ئەڤێت كو بۆ كوردستانێ خەبات كری و سەر دانای. سلاڤ بۆ شه‌هيدێت زندى، بۆ هه‌مى وانقه‌هره‌مانێت كو د ئه‌ركێ پاراستنا كوردستانيدا بريندار بووى. ئەم دبێژینە وان، خزمەتا وە و خەباتا وە مە یا لبەر چاڤە.
هنگ قوتابی یێت خۆشتڤی، هەر سەركەفتی بن و هیڤییا من پاشەڕۆژەكا گەشە بۆ وە هەمیا و جارەكا دی پر ب دل پیرۆزباهییەكا گەرم ل وە هەمیا دكەم و سەركەفتی بن د ژیانا خۆدا.
زۆر سوپاس..
کۆمێنت (0)
تا ئێستا هیچ کۆمێنتێک نەکراوە.