راگەیەنراوێك لە پارێزگاری هەولێرەوە سەبارەت بە دەستپێكردنی بانگەشەی هەڵبژاردن

چەند كاتژمێرێك بەر لە دەستپێكردنی بانگەشەی هەڵبژاردنی خولی شەشەمی پەرلەمانی كوردستان، پارێزگاری هەولێر راگەیەنراوێك بڵاو دەكاتەوە.

لە راگەیەنراوەكەدا ئومێد خۆشناو پارێزگاری هەولێر داوا لەسەرجەم لایەنە سیاسی و بەربژێران دەكات پابەندی بڕیار و رێنماییەكانی لیژنەی ئەمنی و یاساكانی كۆمیسیۆن بن لە پڕۆسەی بانگەشەی هەڵبژاردنی پەرلەمانی كوردستان.

ئەمەی خوارەوە دەقی راگەیەنراوەكەی ئومێد خۆشناو پارێزگاری هەولێرە:-

به‌بۆنه‌ی ده‌ستپێکردنی بانگه‌شه‌ی هه‌ڵبژاردنی خولی شه‌شه‌می په‌رله‌مانی کوردستان، کە بڕیارە لە کاتژمێر 12:00ـی ئەمشەو دەست پێ بکات، داواکارین لە سەرجەم لایەنە سیاسییەکان و بەربژێران لە سنووری پارێزگای هەولێر، له‌پێناو به‌ڕێوه‌چوونى پڕۆسه‌کە به‌ شێوازێكى شارستانی و بەڕەچاوکردنی پێکەوەژیانی ئاشتیيانەی نێوان پێکهاتە نەتەوەیی و ئایینەکان، ڕێزگرتن له‌ پيرۆزییەکان و هێما و سيمبۆلى كوردستان و دوور لە گرژی و ئاڵۆزی، بەشێوەیەکی ئاشتییانە و پاراستنی دیموکراتی و یەکتر قەبووڵکردن، بە پابه‌ندبوون بە بڕیار و ڕێنمايييه‌كانى لیژنەی ئەمنی پارێزگا و یاساکانی كۆميسيۆنى باڵاى سه‌ربه‌خۆى هه‌ڵبژاردنه‌كان، پرۆسەی بانگەشەی هەڵبژاردن بەڕێوە ببەن.

هەموو لایەک دڵنییا دەکەینەوە، بە فەراهەمکردنی ئازادی بۆ سەرجەم لایەنە سیاسییەکان و کاندیدان بەبێ جیاوازی لە سنووری پارێزگاکەمان و به‌ڕێوه‌چوونى ماوه‌ى دیاریكراوى بانگه‌شه‌ى هه‌ڵبژاردن به‌سه‌ركه‌وتوویى، سەرجەم دامودەزگا و لایەنە ئەمنییەكانی سنووری پارێزگاکەمان ڕاسپاردووە پارێزگاری بەڕێوەچوونی ئاشتییانە و بێ كێشەی بانگەشه‌ى هه‌ڵبژاردن بن، بە ئومێدی ئەوەی ئەو ڕۆژانەی دیاریکراوە بۆ بانگەشە، بە شێوەیەکی ئارام و لەسەرخۆ و دوور لە پێشێلکاری بەڕێوەبچێت.

بەگوێرەی كۆمیسیۆنی باڵای سەربەخۆی هەڵبژاردنەكانی عێراق، ئەمشەو كاتژمێر 12:01 بانگەشەی هەڵبژاردن بۆ خولی شەشەمی پەرلەمانی كوردستان دەست پێ دەكات.

بڕیاریشە لە 20ی تشرینی یەکەمی ئەمساڵ، پڕۆسەی ھەڵبژاردنی خولی شەشەمی پەرلەمانی کوردستان ئەنجام بدرێت کە تێیدا لایەنە سیاسی و كاندیدان ركابەری لەسەر بەدەستھێنانی 100 کورسی پەرلەمانی دەکەن.