داوا لە سەرجەم نووسەر و ڕووناكبیرانی هەرێمی كوردستان كرا سەبارەت بە داخستنی ناوە‌ندیی ڕۆشنگە‌ری چاودێر و بنكەی ڕووناكبیری گەلاوێژی، ھە‌ڵوێستی جدییان ھە‌بێت.
شەوی رابردوو بەفەرمانی باڤڵ تاڵەبانی، هێزێكی كۆماندۆ لە سلێمانی هەڵیانكوتایە سەر ناوە‌ندیی ڕۆشنگە‌ری چاودێر و دەستیان بەسەر باڵەخانەكەدا گرت.
بنكەی رووناكبیری گەلاوێژ كە بارەگاكەی هەر لەنێو ئەو باڵەخانەدا بووە كە دەستی بەسەردا گیراوە، لە روونكردنەوەیەكدا دەڵێت: ئێمە سەرقاڵی ئامادەكارییەكان بووین بۆ سازكردنی 27مین فێستیڤاڵی نێودەوڵەتی گەلاوێژ، بەڵام شەوی رابردوو لەلایەن هێزێكی كۆماندۆوە دەست بەسەر بارەگاكەمان و سەرجەم كەلوپەلەكانی ناویدا گیرا.
دەشڵێت: داوا لە نووسە‌ران و ڕووناكبیران دە‌كە‌ین ھە‌ڵوێستی جدییان ھە‌بێت لە‌بە‌رامبە‌ر ئەم كردەوەیە و ڕێگری بكەن لەهەر كارێك كە دەبێتە هۆی بە‌رتە‌سكردنە‌وە‌ی ئازادی ڕادە‌ربڕین و چالاكی ڕووناكبیریی و ئەدەبیی و هونەری لە شاری سلێمانی.
ئەمەی خوارەوە دەقی روونكردنەوەكەی بنكەی ڕووناكبیری گەلاوێژە:-
روونكردنەوەیەك لە بنكەی ڕووناكبیری گەلاوێژ-ەوە
لە كاتێكدا ئێمە سەرقاڵی ئامادە‌كارییە‌كانی سازكردنی (٢٧)مین فێستیڤاڵی نێودەوڵەتی گەلاوێژ بووین كە بڕیارە لەكۆتایی ئەمساڵدا ئەنجامبدرێت، ئێوارەی ڕۆژی ٥-٩-٢٠٢٤، ھێزێكی كۆماندۆ چوونەتە سەر بارە‌گای تۆڕی ناوە‌ندی ڕۆشنگە‌ری چاودێر كە لە‌بە‌شێكی بیناكە‌دا بنكەی ڕووناكبیری گەلاوێژی تیا بووە، دەستیان گرتووە بەسەر ئە‌رشیف و سەرجەم كە‌لو پە‌لە‌كانی بنكە‌كە‌دا، كە ئەرشیفی كارو چالاكییەكانی بنكەكەو (٢٦) فێستیڤاڵی نێودەوڵەتی گەلاوێژی لەخۆگرتووە، ئێمە لای خۆمانە‌وە بە‌توندی ئیدانە‌ی ئەو كارە دە‌كە‌ین و پێمانوایە ئەم كردەوەیە لە‌كە‌داركردنی ناوبانگی پایتە‌ختی ڕۆشنبیریی و بێبایە‌خكردنی ئەو مێژووە پڕ لە سەروەری و گە‌شە‌ی دنیای ڕووناكبیری و ئە‌دە‌بییە لەشاری سلێمانیدا، چونكە لای ھە‌مووان ڕوونە كە بنكەی ڕووناكبیری گەلاوێژ بنكە‌یە‌كی ڕووناكبیرییە و لە‌ماوە‌ی تەمەنیدا (٢٦) فێستیڤاڵی نێودەوڵەتی ڕێكخستووەو ڕۆڵێكی دیاری ھە‌بووە لە‌ناساندنی سلێمانی وەك پایتە‌ختی ڕۆشنبیری و بانگھێشتكردن و كۆكردنە‌وە‌ی سە‌دان نووسەر و ڕووناكبیر لە ئە‌وروپا و وڵاتانی دراوسێ و عێراق و هەرێمی كوردستاندا بۆ شاری سلێمانی، ھە‌روە‌ھا سە‌كۆیە‌كی گرنگی داھێنان بووە و چە‌ندین قە‌ڵە‌می تازەی پێگە‌یاندووە و دەیان نووسەریشی خەڵاتكردووە.
لە كۆی فێستیڤاڵەكانیشدا دە‌رگایە‌كی فراوانی بە‌ڕووی ھونە‌رمەندان و چالاكی ھونە‌ریدا كردۆتە‌وە، لە‌و سۆنگە‌یە‌وە سەرەڕای سەركۆنەكردنی ئەم كارە كە بەپێشهاتێكی مەترسیداری دەزانین.
داوا لە‌نووسە‌ران و ڕووناكبیران دە‌كە‌ین كە ھە‌ڵوێستی جدییان ھە‌بێت لە‌بە‌رامبە‌ر ئەم كردەوەیە و ڕێگری بكەن لە هەر كارێك كە دەبێتە هۆی بە‌رتە‌سكردنە‌وە‌ی ئازادی ڕادە‌ربڕین و چالاكی ڕووناكبیریی و ئەدەبیی و هونەری لەمشارەدا.
بنكەی ڕووناكبیری گەلاوێژ
کۆمێنت (0)
تا ئێستا هیچ کۆمێنتێک نەکراوە.