لە چوارچێوەی سەردانەکەیدا بۆ ئەڵمانیا، ڕێبەر ئەحمەد، وەزیری ناوخۆی حكوومەتی هەرێمی کوردستان، سەردانی بارەگای سەرەکیی ئاژانسی فیدڕاڵیی ئەڵمانیا بۆ هاوکاریی تەکنیکی (THW)ی کرد.
ڕێبەر ئەحمەد، وەزیری ناوخۆی حکومەتی هەرێمی کوردستان لە سەردانەكەیدا بۆ بارەگای سەرەکیی ئاژانسی فیدڕاڵیی ئەڵمانیا بۆ هاوکاریی تەکنیکی، لە لایەن بەڕێز خاتوو سابین لاکنەر، سەرۆکی ئاژانسەکە پێشوازیی لێکرا.
لە دیدارێكدا، سەرەتا وەزیری ناوخۆ پیرۆزبایی لە خاتوو سابین کرد بە بۆنەی دەستبەکاربوونی وەک یەکەم سەرۆکی ئافرەت بۆ ئەو ئاژانسە. دواتر باس لە پەیوەندییەكانی نێوان هەردوولا كرا و هاوبەشیی ئاژانسەكەی لەگەڵ وەزارەتی ناوخۆی هەرێمی كوردستان بەرز نرخاند.
لە لایەن خۆیەوە خاتوو سابین وێڕای خۆشحاڵیی زۆریان بە سەردانەكەی بەڕێز وەزیری ناوخۆی هەرێمی كوردستان بۆ بارەگای سەرەکیی ئاژانسەكەیان لە ئەڵمانیا، خۆشحاڵیی خۆی دەربڕی کە توانیویانە بەهۆی ئەو پشتیوانی و کارە هاوبەشەی لەگەڵ وەزارەتی ناوخۆی هەرێمی كوردستان هەیانە، دەسکەوتەکانیان لە ڕووی نێودەوڵەتییەوە کاردانەوەی هەبێت و شانازیی پێوە بکەن، بەتایبەتیش لە بەهاناوەچوونی قوربانییانی بوومەلەرزەکەی تورکیا و سووریا. دواتر باس لە قۆناغەکانی داهاتووی کاری هاوبەشی هەردوولا کرا.
جێی باسە ئاژانسی فیدڕاڵیی ئەڵمانیا بۆ هاوکاریی تەکنیکی، بەرپرسی وەڵامدانەوەی قەیران و کارەساتە لە ئەڵمانیا و هاوبەشی سەرەکیی وەزارەتی ناوخۆی هەرێمی كوردستانیشە و تواندراوە بەهۆی ئەو هاوبەشییەوە، سوود لە ئەزموونی ئەڵمانیا وەربگیرێت بۆ بەرەوپێشچوونی سیستەمی وەڵامدانەوەی قەیران و کارەسات لە هەرێمی کوردستاندا.
کۆمێنت (0)
تا ئێستا هیچ کۆمێنتێک نەکراوە.