بەڕێوەبەرایەتی ئاسایشی هەولێر لە روونكردنەوەیەكدا هۆشداری دایە هاووڵاتییان كە لە تۆڕی كۆمەڵایەتی واتسئاب وەڵامی پەیوەندیی نەناسراوی وڵاتانی بیانی نەدەنەوە، چونكە لە رێگەیەوە مۆبایلەكانتان هاك دەكرێت و لەبەرامبەردا داوای پارە دەكەن.
ئاسایشی هەولێر لە روونكردنەوەیەكدا رایگەیاند: ئاگاداری هاووڵاتییان دەکەینەوە كە چەند ژمارە مۆبایلێکی وڵاتانی بیانی بە ڕێگای تۆڕی کۆمەڵایەتی (وەتسئاپ) بەناوی هەلی کار و قازانجکردن و کۆمپانیای بیانی کورتەنامە بۆ هاووڵاتییان دەنێرن.
راشیگەیاند: دوای ئەوەی کە هاووڵاتییان لەگەڵیاندا دەکەوێتە پەیوەندی، داوای (ژمارەی نهێنی/کۆد) دەکات کە ڕەوانە کراوە بۆ ژمارەی (وەتسئاپ)، لەگەڵ پێدانی ئەو (ژمارەی نهێنی /کۆد)ـە کە بۆت ڕەوانە کراوە، ڕاستەوخۆ دەست بەسەر سەرجەم هەژمارەکان دەگرن کە لەسەر ژمارە مۆبایلەکەت لە تۆڕە کۆمەڵایەتییەکان دانراوە.
هەروەها رایگەیاند: دواتر لە بەرامبەر گەڕانەوەی هەژمارەکانت، داوای بڕێکی زۆر پارە دەکەن.
ئاسایشی هەولێر داوای لە هاووڵاتییان كرد بەهیچ شێوەیەک وەڵامی ئەو جۆرە پەیوەندییانە نەدەنەوە و هەر (ژمارەیەکی نهێنی /کۆد)ێک، بۆ ژمارە مۆبایلەکەتان هات دەبێت بۆ کەس ڕەوان نەکرێت تاکو هەژمارەکانتان پارێزراو بێت.
کۆمێنت (0)
تا ئێستا هیچ کۆمێنتێک نەکراوە.