حكوومەتی ئیسڕائیل لە رێگەی بڵاوكردنەوەی وێنەیەكدا، بەرپرسیارەتی كوشتنی ئیسماعیل هەنییەی سەرۆكی بزووتنەوەی حەماسی لە هێرشێكدا لە تارانی پایتەختی ئێران گرتەئەستۆ.
ماڵپەڕی نووسینگەی راگەیاندنی حكوومەتی ئیسڕائیل لە تۆڕی كۆمەڵایەتی فەیسبووك وێنەیەكی ئیسماعیل هەنییەی بە هێمایەكی چەوتی سوور بڵاوكردەوە وەك ئاماژەیەك بۆ كوشتن و لەناوبردنی ناوبراو.
لەسەر وێنەكە نووسیویەتی لەناوبرا (eliminated).
هەر لەسەر وێنەكەدا نووسیویەتی "ئیسماعیل هەنییە سەرۆكی بزووتنەوەی حەماس لە رێگەی هێرشێكی هاژەكی ورد و دروستدا لە تارانی پایتەختی ئێران هاتە كوشتن".
لای خۆشییەوە سەرلەبەیانی ئەمڕۆ چوارشەممە بزووتنەوەی حەماس هەواڵی كوژرانی ئیسماعیل هەنییە سەرۆكی مەكتەبی سیاسی بزووتنەوەكەیانی لە هێرشێكدا لە شوێنی مانەوەیدا لە تارانی پایتەختی ئێران بڵاوكردەوە.
ئیسماعیل هەنییە رۆژی سێشەممە گەیشتبووە تاران بە مەبەستی بەشداریكردن لە رێوڕەسمی سوێندخواردن و دەستبەكاربوونی مەسعوود پزیشكیان سەرۆك كۆماری ئێران.
دەسەڵاتدارانی ئێرانیش ئاماژەیان بەوەداوە كە لێكۆڵینەوەكانیان لەسەر كوژرانی هەنییە دەستپێكردووە و لە كاتێكی دیكەدا ئەنجامی لێكۆڵینەوەكە بڵاو دەكەنەوە.
کۆمێنت (0)
تا ئێستا هیچ کۆمێنتێک نەکراوە.