نەتەوە یەکگرتووەکان ڕایگەیاند، ژمارەی ئەو کەسانەی کە بەھۆی لافاوەوە لە پارێزگای سەعدە باکووری یەمەن گیانیان لەدەستداوە، بەرزبووەتەوە بۆ سێ کەس.
نووسینگەی نەتەوە یەکگرتووەکان بۆ ھەماھەنگی کاروباری مرۆیی لە یەمەن لە ڕاگەیاندراوێکدا ئاماژەی بەوەداوە، ھەفتەی ڕابردوو، باران بارینی بەخوڕ و لافاو پارێزگای سەعدە-ی گرتەوە کە بەھۆیەوە زیانێکی زۆری بە خێزانە ئاوارەکان گەیاندووە.
ڕاشیگەیاندووە کە تا ئێستا بەھۆی لافاوەوە لە پاریزگای سەعدە، سێ کەس گیانیان لەدەستداوە لەنێویاندا یەک منداڵ ھەیە، ھەروەھا زیانیش بەر دوو ھەزار خێزان کەوتووە.
باسی لەوەش کردووە کە لەگەڵ ھاوبەشەکانیان، پاڵپشتی مرۆیی پێشکەش بە سەدان خێزان دەکەن کە بەھۆی لافاوەکەوە زیانیان بەرکەوتووە.
دوێنێ یەکشەممە، کۆمیسیۆنی نەتەوە یەکگرتووەکان بۆ کاروباری پەنابەران ڕایگەیاندبوو کە بەھۆی لافاوەوە لە پارێزگای سەعدە، دوو کەس گیانیان لەدەستداوە و ھەزار و300 شوێنی نیشتەجێبوونی ئاوارەکانیش زیانیان بەرکەوتووە.
کۆمێنت (0)
تا ئێستا هیچ کۆمێنتێک نەکراوە.