لیژنەی ئۆڵەمپیی عێراق بڕیاری دا هەر هاووڵاتییەكی عێراقی لە دەرەوەی وڵات، بیەوێت لە یارییەكانی ئۆڵەمپیادی پاریس بەشداربێت و هانی هەڵبژاردەی ئۆڵەمپیی عێراق بدات، بلیتی یارییەكانی بەلاش بۆ دابین دەكرێت.
لیژنەی ئۆڵەمپیی عێراق لە بەیاننامەیەكدا بڵاوی كردەوە: لەسەر راسپاردەی محەمەد شیاع سوودانی سەرۆك وەزیرانی عێراق، هەر هاووڵاتییەكی هەندەران بیەوێت لە یارییەكانی هەڵبژاردەی ئۆڵەمپیی عێراق لە ئۆڵەمپیادی پاریس لەنێو یاریگە ئامادەبێت بە مەبەستی هاندان، بلیتی یارییەكەی لەسەر ئێمە دەبێت و بەلاش بۆی دابین دەكرێت.
راشیگەیاند: هەر هاووڵاتییەك بیەوێت بێت بۆ هاندانی هەڵبژاردەی ئۆڵەمپیی عێراق لە یارییەكانی ئۆڵەمپیای پاریس، با پەیوەندیمان پێوە بكات بۆ دابینكردنی بلیتی یارییەكە.
بڕیارە رۆژی 24ی ئەم مانگە لە شاری لیۆنی فڕەنسا، یارییەكانی ئۆڵەمپیادی 2024 دەست پێ بكات، هەڵبژاردەی ئۆڵەمپیی عێراق لە پاڵەوانیەتییەكەدا لە یاریی تۆپی پێ لە گرووپی دووەم یاری دەكات لەگەڵ هەریەك لە هەڵبژاردەكانی مەغریب، ئۆكڕاینا و ئەرجەنتین.
یەكەم یاریی هەڵبژاردەی ئۆڵەمپیی عێراقیش لە ئۆڵەمپیادی پاریس لە رۆژی 24ی 7 دەبێت بەرامبەر هەڵبژاردەی ئۆڵەمپیی ئۆكڕاینا، یارییەكەش لە كاتژمێر 20:00 شەو بەڕێوە دەچێت، دواتریش رۆژی شەممە بەرامبەر هەڵبژاردەی ئۆڵەمپیی ئەرجەنتین یاری دەكات.
کۆمێنت (0)
تا ئێستا هیچ کۆمێنتێک نەکراوە.