هۆبەی تۆمارکردنی پرۆژەکانی نیشتەجێبوون کرایەوە

بە واژۆی وەزیری دادی حکومەتی هەرێمی کوردستان، فەرسەت ئەحمەد عەبدووڵا، بڕیار درا بە کردنەوەی هۆبەی تۆماری پرۆژەکانی نیشتەجێبوون لەناو بەڕێوەبەرایەتییەکانی تۆمارکردنی خانووبەرە لە پارێزگەکانی هەولێر، دهۆک، سلێمانی و هەڵەبجە، و ئیدارە سەربەخۆکانی سۆران، زاخۆ، راپەڕین و گەرمیان، بە مەبەستی تۆمارکردنی سەرجەم پرۆژە نیشتەجێکانی وەبەرهێنان. 

بە پێی (بەیانی) ژمارە (6)ی ساڵی (2024)ـی وەزارەتی داد بە ژمارە (20/3253) لە (9ی7ی2024)، پاڵپشت بە بڕیاری ئەنجومەنی وەزیران -ئەنجومەنی باڵای وەبەرهێنان ژمارە (632) لە (3ی3ی2024)، بە پێی ئەو دەسەڵاتەی بە پێی مادەی (9) لە یاسای وەزارەتی داد ژمارە (13)ی ساڵی (2007) و لەبەر بەرژەوەندیی گشتی، ئەم بڕیارە لەلایەن وەزیری دادەوە واژۆ کراوە. 
کە بە پێی بەیانەکە، لێپرسراو و فەرمانبەرانی ئەو هۆبانە تەواو تەرخان دەکرێن (تفرغ) بۆ تۆمارکردنی کاروبارەکانی (یەکبوون و جیاکردنەوەی) سەرجەم پرۆژەکانی نیشتەجێبوون.
ئەم بەیانە لە ڕۆژی دەرچوونییەوە جێبەجێ دەکرێت و لە ڕۆژنامەی فەرمیی (وەقایعی کوردستان) بڵاو دەکرێتەوە.