دوای ئەوەی هەردوو وەزارەتی ناوخۆی حکوومەتی عێراق و هەرێمی كوردستان ده‌ستگیركردنی گرووپێکییان ڕاگەیاند کە تاوانبارن بە سووتاندنی بازاڕەکانی هەولێر، دهۆک و کەرکوک، کاسبکارانی بازاڕی قەیسەریی شاری هەولێر داوای توندترین شێوەی سزادان بۆ تاوانباران دەکەن.
دوای ئه‌وه‌ی گوتەبێژی وەزارەتی ناوخۆی عێراق، عەمید میقداد میری و بەڕێوەبەری گشتیی دیوانی وەزارەتی ناوخۆی هەرێمی کوردستان هێمن میرانی لە کۆنگرەیەکی ڕۆژنامەوانییدا لە بەغدا گرووپێکی سێ کەسیان ڕاگەیاند کە لەماوەی ڕابردوودا كاره‌كانی سووتاندنی بازاڕەکانی شاری هەولێر، دهۆک و کەرکووکیان ئه‌نجامدابوو و ئاشکرایان کرد کە گرووپەکە سەر بە پەکەکەن.
بۆ ئه‌م مه‌به‌سته، کاسبکارانی بازاڕی قەیسەریی هه‌ولێر داوا دەکەن کە تاوانباران بە توندترین شێوە سزا بدرێن و نایانەوێت سزاکەیان ئەوە بێت کە لە گرتووخانەکان سزاکەیان بەسەربەرن، بەڵکو داوای سزای لە سێدارەدان دەکەن.
کاسبکار عومەر محەمەد کە دوکانەکەی سووتێنراوە، داوا دەکات کە ئەوانەی ئاگریان بەرداوەتە قووت و ژیانی خەڵک، سزایەکی توندیان بەسەردا بسەپێنن.
کاسبکار عومەر محەمەد بۆ ئاژانسی ئانادۆڵو گوتی: "لەکاتی ئاگرکەوتنەوەکە، هەموو کەس دەیزانی کە دەستێک لە پشت سووتانەکە هەیە، چونکە لەماوەی چەند ساڵی ڕابردوودا قەت ئاگرکەوتنەوەی وا نەبووە، پەنا بەخوا ئێستا بە هەوڵی هەردوو حکوومەتی عێراق و حکوومەتی هەرێمی كوردستان دەستەکان دەبڕدرێن بۆ ئەوەی جارێکی دیکە نەتوانن تاوانی وا ئەنجام بدەن".
لەبارەی داواکاری کاسبکاران بۆ سزای تاوانبارەکان، عومەر محەمەد گوتی: "داوا دەکەین ئەو تاوانبارانە سزایەکی توند بدرێن و ته‌نیا به‌ند كردن نه‌بێت.
کاسبکارێكی دیكه به‌ناوی دەهام عەلی بۆ ئاژانسی ئانادۆڵو گوتی: "ئێمە لە سەرەتادا زانیمان کە ئەو ئاگرکەوتنەوە شۆڕتی کارەبا نییە و دەستکردە، ئاگرەکە ئاسایی نەبوو، ئێستاش ئێمە دڵخۆش بووین کە دەسته‌كه ئاشکرا کرا".
دەهام عەلی گوتیشی: "داوا دەکەین بە توندترین شێوە تاوانباران سزا بدرێن بۆ ئەوەی جارێکی دیکە ئەم کردەوانە دووبارە نەبنه‌وە.
لەبارەی دەستگیرکردن و ئاشکرا کردنی تاوانباران کە گرووپێکی سه‌ر به پەکەکەن، محەمەد عزەدین گوتی: "داواکارییەکەمان ئەوەیە، هەموو ئەو کاسبکارانەی زەرەرمەند بوونە بەهۆی ئاگرکەوتنەوەکان، هەموومان لە شوێنێک کۆبکرێینەوە و ئەو تاوانبارانە بەبەرچاوی ئێمەوە لە سێدارە بدرێن".
ئەمە لە کاتێکدایە کە لەماوەی چەند مانگی ڕابردوودا، ئاگر لە ژمارەیەک بازاڕ و كۆگا له شاره‌كانی هه‌رێمی كوردستان كه‌وته‌وه.
کۆمێنت (0)
تا ئێستا هیچ کۆمێنتێک نەکراوە.