لە کوێستانەکانی شارۆچكەی سیدەکان سێ كەس بەر بۆردومانی فڕۆکە جەنگییەكانی تورکیا کەوتن و بەهۆیەوە دووانیان گیانیان لەدەست دا و یەكێكی تریش بریندار بوو.
بە گوتەی کەسوکاری قوربانییەكان، هەرسێ قوربانییەكە خەڵكی شاری مەهابادی کوردستانی ئێرانن و ماوەی چەند رۆژێك بەر لە ئێستا هاتبوونە سنووری هەرێمی کوردستان و کوێستانەکانی سیدەکان، لە رۆژی هاتنیشیان چارەنووسیان نادیار بووە و گومان دەکرا لەلایەن فڕۆکە جەنگییەكانی تورکیاوە کرابنە ئامانج.
لەبارەی رووداوەكە، ئێحسان چەلەبی قایمقامی سیدەکان هەواڵەكەی پشتڕاست کردەوە و گوتی: چەند ڕۆژێکە سێ كەس کە خەڵکی کوردستانی ئێرانن، هاتوونەتە سنوورەکە.
گوتیشی: سێ كەسەكە لە رۆژی 29/4 لە کوێستانی سۆرەنە لەنێوان خنێرە و خواکوڕک بەر بۆردومانی فڕۆکەکانی تورکیا کەوتوون و بەهۆیەوە دوانیان گیانیان لەدەستداوە و کەسی سێیەمیش بریندار بووە.
قایمقامی سیدەکان ئاماژەی بەوەش کرد کە بەهۆی بەردەوامی بۆردومانەکان و بارودۆخی ئەمنی ناوچەکە، تا ئێستا نەتوانراوە بەدوواداچوون بۆ دۆزینەوەی تەرمی ئەو دوو کەسە بکرێت.
جەختیشی كردەوە كە لە هەوڵی ئەوەدان لە ڕێگای پەیوەندییەکانەوە تەرمەکان بگەڕێندرێنەوە بۆ کەسوکارەكانیان.
سیدەكان / مەهدی داود
کۆمێنت (0)
تا ئێستا هیچ کۆمێنتێک نەکراوە.