نێچیرڤان بارزانی و حەیدەر عەبادی : نابێ هاووڵاتییان باجی كێشە سیاسییەكان بدەن

پێشنیوەڕۆی ئەمڕۆ یەكشەممە، 2024/1/14 نێچیرڤان بارزانی، سەرۆكی هەرێمی كوردستان، لە بەغدا لە دیدارێكدا لەگەڵ حەیدەر ئەلعەبادی، سەرۆكی هاوپەیمانیی نەسر دەربارەی دۆخی عێراق و پەیوەندییەكانی هەولێر ـ بەغدا بیروڕیان گۆڕییەوە و تیشكیان خستە سەر دوا پێشهاتەكانی ناوچەكە.
هەردوولا داكۆكییان لە پێوستیی پاراستنی عێراق لە لێكەوتەكانی دۆخی ئاڵۆزی ناوچەكە و گرنگیی هاریكاریی لایەنە سیاسییەكان و پێكهاتەكانی عێراق كرد بۆ تێپەڕاندنی ناكۆكییەكان و چارەسەركردنی كێشەكان بە گفتوگۆ و لێكگەیشتن، هەروەها هاوڕا بوون كە نابێ هاووڵاتییان لە ژیان و گوزەر‌انی خۆیان، باجی كێشە سیاسییەكان بدەن.
تاوتوێكردنی مەترسییەكانی تیرۆر و هەڕەشەی داعش لەسەر ئارامی و سەقامگیریی وڵات، تەوەرێكی دیكەی دیدارەكە بوو.