بڕیارە سبەی ئەنجوومەنی نوێنەرانی عێراق دەنگ لەسەر پڕۆژەیاسای بەپارێزگاکردنی هەڵەبجە بدات، کە هەڵەبجییەکان زیاتر لە 10 ساڵە چاوەڕوانی بڕیاری بەپارێزگابوونی شارەکەیان دەکەن.
سبەی دووشەممە 18ـی 09ـی 2023 ئەنجوومەنی نوێنەرانی عێراق کۆ دەبێتەوە و نووسینگەی ڕاگەیاندنی ئەنجوومەنی نوێنەرانی عێراق کارنامەی دانیشتنەکەی بڵاو کردەوە.
بەپێی کارنامەی دانیشتنی سبەی، بڕگەی دووەمی دانیشتنی ئەنجوومەنی نوێنەرانی عێراق تایبەت بە دەنگدان لەسەر بەپارێزگاکردنی هەڵەبجە کە لە چوار ماددە پێکهاتووە.
پڕۆژەیاسای بە پارێزگاکردنی هەڵەبجە دووجار خوێندنەوەی بۆ کراوە و بڕیارە سبەی دەنگی لەسەر بدرێت و خەونی هەڵەبجییەکان بێتەدی.
لە ساڵی 2013 نێچیرڤان بارزانی، کە ئەوکات سەرۆکی حکوومەتی هەرێمی کوردستان بوو، ڕەشنووسی یاسای بەپارێزگاکردنی هەڵەبجەی ڕادەستی حکوومەتی عێراق کرد، ئەنجوومەنی وەزیرانی عێراق لە کۆبوونەوەی ئاسایی ژمارە 11 لە ڕۆژی 13ـی 03ـی 2023 پڕۆژەیاسای بنیاتنانی پارێزگای هەڵەبجە لە عێراق، ژمارە 23131 پەسەند کرد.
دوای پەسەندکردنی پڕۆژەیاسای بەپارێزگاکردنی هەڵەبجە، محەمەد شیاع سوودانی سەرۆک وەزیرانی عێراق هاتە هەولێر و لەلایەن مەسرور بارزانی سەرۆکی حکوومەتی هەرێمی کوردستان پێشوازی لێکرا و لە میانی سەردانەکەی لە لێدوانێکی ڕۆژنامەوانیدا سوودانی ڕایگەیاند: ئەم تاوانە گەورەیەی کە لەلایەن ڕژێمی دیکتاتۆرەوە بۆ سەر هەڵەبجە ئەنجام درا لە ویژدانی عێراقییەکان و مرۆڤایەتیدا لەبیر ناکرێت، ئەرکی حکوومەتی فیدراڵی و دەوڵەتی عێراقە کە ئەرکەکانی خۆی بەرامبەر بە قوربانییەکان جێبەجێ بکات.
لەبەرامبەردا سەرۆکی حکوومەتی هەرێمی کوردستان دەستخۆشی لە پەسەندکردنی بەپارێزگاکردنی هەڵەبجە کرد و ئاماژەی بەوە دا، "هیوادارم ئەم بڕیارەی کە دراوە ببێتە دەستپێکێک بۆ کەمکردنەوەی ئازارەکانی خەڵکی هەڵەبجە."
کۆمێنت (0)
تا ئێستا هیچ کۆمێنتێک نەکراوە.