ڕۆژانە زیاتر لە 90 حاڵەتی توندوتیژی خێزانی لە عێراقدا تۆمار دەكرێت

وەزارەتی ناوخۆی عێراق دوێنێ هەینی ئاشكرایكرد، ڕۆژانە زیاتر لە 90 حاڵەتی توندوتیژی خێزانی تۆمار دەكرێت.
لەپارێزگاكانی عێراقدا ڕێژەی بێ وێنەی توندوتیژی خێزانی لە دژی ئافرەتان و منداڵان و بەساڵاچووان و تەنانەت پیاوانیش تۆمار دەكرێت، هاوكات پسپۆڕانی كاروباری كۆمەڵگەی مەدەنیش هۆكارەكەی دەگەڕێننەوە بۆ بارودۆخی ناسەقامگیری سیاسی و ئابووری و ئەمنی لە وڵاتەكەدا، كە لەسەر  دۆخی گشتی عێراقییەكاندا ڕەنگدانەوەی هەبووە و بووەتە هۆی تێكچوونی باری دەروونی.
بە گوتەی لیوا عەدنان حەمود سەلمان، بەڕێوەبەری بەڕێوەبەرایەتیی پاراستنی خێزان و منداڵ لە توندوتیژی خێزانی، سەر بە دەزگای وەزارەتی ناوخۆی بۆ كاروباری پۆلیس، بەڕێوەبەرایەتییەكە سەرجەم سكاڵاكانی توندوتیژی خێزانی لە ڕێگەی هێڵی گەرمی 139 لە سەرجەم پارێزگاكاندا وەردەگرێت.
هەروەها گوتی: ڕێژەی حاڵەتەكانی دەستدرێژی مێرد بۆ سەر هاوسەرەكەی لە چوارچێوەی دیاردەی توندوتیژی خێزانی لە وڵاتدا گەیشتە 57%ی كۆی حاڵەتەكان، لە كاتێكدا دەستدرێژی ژن بۆ سەر مێردەكەی گەیشتە 17% و ڕێژەی هێرشكردنە سەر منداڵانیش گەیشتە 6% و هێرشكردنە سەر كەسانی بەساڵاچوو-ش، وەك باپیر و داپیرە، گەیشتە 2%.
ئاماژەی بەوەشكرد، بەڕێوەبەرایەتییەكە 16 بەشی پاراستنی مرۆڤی هەیە كە بەسەر سەرجەم پارێزگاكاندا دابەشكراون، لەنێویاندا دوو بەشی لەلای كەرخ و ڕوسافەیە، كە ڕۆژانە تێكڕا زیاتر لە 90 پەیوەندی تۆمار دەكەن و بەپێی جۆری توندوتیژی ڕیز دەكرێن.
لەلایەن خۆیەوە سوهاد مەعموری، توێژەر لە كاروباری كۆمەڵگا گوتی: تاوانەكانی توندوتیژی خێزانی بەردەوام لە عێراق پەرەدەسەنن، بابەتەكەش دەگەڕێتەوە بۆ چارەسەرنەكردن و گرنگی نەدان لەلایەن حكومەتەوە.
لە ساڵی 2020ەوە ئەنجوومەنی وەزیرانی عێراق ڕەشنووسی یاسای "دژی توندوتیژی خێزانی"ی پەسەند كرد و ڕەوانەی پەرلەمان كرد، بەڵام تا ئێستا یاساكە دەرنەچووە.