دوای نیوه‌ڕۆی ئه‌مڕۆ پێنجشه‌م له پارێزگای دیاله له ناوه‌ڕاستی عێراق پاسێكی گواستنه‌وه‌ی یاریزانان تووشی ڕووداوی هاتوچۆ بوو و له ئه‌نجامدا 10 یاریزانی تیپێكی میلـلی بریندار بوون.
دوای نیوه‌ڕۆی ئه‌مڕۆ پێنجشه‌م تیپی تۆپی پێی مووه‌ده له كاتی چوونیان بۆ ئه‌نجامدانی یارییه‌كی دۆستانه‌ی تۆپی پێ له‌سه‌ر ڕێگه‌ی هه‌ردوو شاری میقدادییه و به‌عقووبه پاسه‌كه‌یان تووشی ڕووداوی هاتوچۆ بوو.
تیپی تۆپی پێی مووه‌ده كه یه‌كێكه له تیپه میلـلییه به‌هێز و به‌ناوبانگه‌كانی پارێزگای دیاله، له ئه‌نجامی ڕووداوه‌كه 10 یاریزانیان بریندار بوون.
ئه‌مبوڵانس و تیمه‌كانی پزیشكی نه‌خۆشخانه‌ی میقدادییه گه‌یشتنه شوێنی ڕووداوه‌كه و یاریزانه برینداره‌كان گواسترانه‌وه بۆ نه‌خۆشخانه.
به‌رپرسانی نه‌خۆشخانه‌ی میقدادییه سه‌باره‌ت به ته‌ندروستی یاریزانه‌كان، جه‌ختیان كرده‌وه كه برینی یاریزانه‌كان سووك و جێگه‌ی مه‌ترسی نین.
کۆمێنت (0)
تا ئێستا هیچ کۆمێنتێک نەکراوە.