چه‌ند رۆژێكی دیكه‌ له‌ هه‌رێمی كوردستان رێژنه‌باران ده‌بارێت

شاره‌زایه‌كی كه‌شناسی ئاشكرای كرد كه‌ چه‌ند رۆژێكی دیكه‌ بایه‌كی شێدار ده‌گاته‌ هه‌رێمی كوردستان و به‌هۆیه‌وه‌ له‌ هه‌ندێ ناوچه‌ رێژنه‌ ده‌بارێت.

ئاراس جه‌بار شاره‌زای كه‌شناسی سه‌باره‌ت به‌ كه‌شوهه‌وا و گۆڕانكارییه‌كان بۆ ڕۆژانی داهاتوو ڕایگه‌یاند: ئاراستە بای باکوری رۆژھەڵات لە سبەی چوارشه‌مه‌وه‌ کاریگەری کەم دەبێتەوە لەسەر ناوچەکانی رۆژھەڵاتی ھەرێم و لە پێش نیوەرۆی رۆژی پێنجشەم کۆتای پێ دێت.

ڕاشیگه‌یاند: ھەر لە ئێوارەی رۆژی پێنجشەمەوە بارستە ھەوایەکی شێدار لە بەرزایەکانی سەرەوەی ھەوا لە باکوری سعوودییەوە روو دەکاتە وڵاتی ئوردن و باشووری سووریا و رۆژئاوای عێراق و ئەگەری چڕبوونەوەی دەبێت بەشێوەی چالاکبوونی ھەورە برووسکە و بارانبارین لە ناوچەی جیاوازدا.

ئاراس جه‌بار هه‌روه‌ها ڕایگه‌یاند: دواتر لە رۆژانی ھەینی و شەممەی داهاتوو کاریگەری ئەو بارستە ھەوایە دەگاتە ناوچەکانی دیکەی عێراق و ھەرێمی کوردستان، لەو ماوەیەدا ئاسمانی ناوچەکە بە زۆری بۆ نیمچەھەور و ھەوری تەواو دەگۆڕێت، لە ھەندێ ناوچەش بە دیارینەکراوی پێشبینی رێژنە بارانی کورتخایه‌ن دەکەین.

سه‌باره‌ت به‌ پله‌كانی گه‌رماش، شارزاكه‌ی كه‌شناسی ئاماژه‌ی به‌وه‌ دا: پلەکانی گەرما بە درێژایی ئەم ھەفتەیە و تا ناوەڕاستی ھەفتەی ئاینده‌ گۆڕانکاری ئەوتۆی بەسەردا نایەت و زیاتر جێگیر دەبێت.

هه‌روه‌ها پله‌كانی گه‌رمای پێشبینیكراوی سبه‌ی چوارشه‌می شاره‌كانی به‌مشێوه‌ی خواره‌وه‌ دیاری كرد :-

ھەولێر: 44 بۆ 45 پلە

سلێمانی: 41 بۆ 42 پلە

دھۆک: 43 بۆ 44 پلە

ھەڵەبجە: 42 بۆ 43 پلە

کەرکووک: 45 بۆ 46 پلە

گەرمیان: 46 بۆ 47 پلە

راپەرین: 42 بۆ 43 پلە

سۆران: 41 بۆ 42 پلە