ئەنجوومەنی پارێزگای هەولێر خوێندنەوە بۆ هێنانەکایەی قەزای هەریر دەکات

ئەنجوومەنی پارێزگای هەولێر لە ناوەڕاستی ئەم هەفتەیەدا کۆ دەبێتەوە و خوێندنەوە بۆ هێنانەکایەی قەزای هەریر دەکات.

کاتژمێر 11:30ـی ڕۆژی دووشەممە 07ـی 08ـی 2023 ئەنجوومەنی پارێزگای ھەولێر کۆبوونەوەی ئاسایی خۆی ئەنجام دەدات.

ئەنجوومەنی پارێزگای هەولێر ناوەڕۆکی کۆبوونەوەکەی خستەڕوو، دەڵێت: لە کۆبوونەوەکەدا ڕاپۆرتی لێژنەی ناوخۆی ئەنجوومەنی پارێزگای ھەولێر خوێندنەوەی بۆ دەکرێت سەبارەت بە نووسراوی پارێزگای ھەولێر ژمارە (7917) لە 24ـی 07ـی 2023 لەبارەی:-

-  ھێنانەکایەی قەزای ھەریر کە ناوەندەی شارۆچکەی ھەریر بێت.

- پچڕاندنی ناحییەی باسرمە لە قەزای شەقڵاوە و لکاندنی بە قەزای ھەریر.

ئەنجوومەنی پارێزگای هەولێر ئاماژەی بەوە داوە کە دوای خوێندنەوەی ڕاپۆرتەکە بوار بە ئەندامانی ئەنجوومەن دەدرێت بۆ پرسیار و تێبینیەکانیان لەسەر ڕاپۆرتەکە.