دوای ئەوەی دوێنێ لە ڕووداوێکی هاتووچۆ لە دەربەندیخان پێنج کەسی یەک خێزان گیانیان لەدەست دا، سەرۆکی حکوومەتی هەرێمی کوردستان پەیوەندیی بە خانەوادەکەی کرد و سەرەخۆشی لێکردن.
ئەمڕۆ چوارشەممە 02ـی 08ـی 2023 مەسرور بارزانى، سه‌رۆكى حکوومەتی هه‌رێمى كوردستان، لە پەیوەندییەکی تەلەفۆنیدا پرسە و سەرەخۆشی لە ( سەید حەمە ناسر) کرد کە دوێنێ لە ڕووداوێکی دڵتەزێنی هاتووچۆدا لە دەربەندیخان، پێنج کەسی خێزانەکەی گیانیان لەدەست دا.
لە پەیوەندییە تەلەفۆنییەکەدا سەرۆکی حکوومەت هاوخەمی خۆی پێگەیاند و هیوای خواست، خوای مەزن گیانیان بە بەهەشت شاد بکات و سەبووری و ئارامییان پێ ببەخشێت.
لە بەرامبەردا سەید حەمە ناسر بە ناوی بنەماڵەکەیەوە سوپاسی سەرۆکی حکوومەتی کرد بۆ پەیوەندی و هاوخەمییەکەی.
دوێنێ سێشەممە لەسەر شاخی بەرانان ئۆتۆمبێلێکی بارهەڵگر کەوتەسەر ئۆتۆمبێلێکی نیسان سەنی لە دەربەندیخان، بەهۆیەوە پێنج کەس کە ئەندامی خێزانێک بوون، گیانیان لەدەست دا.
کۆمێنت (0)
تا ئێستا هیچ کۆمێنتێک نەکراوە.