شاره‌زایه‌كی كه‌شناسی ڕایگه‌یاند كه به‌گوێره‌ی پێشبینییه‌كان مانگی له هه‌رێمی كوردستان كه‌شوهه‌وا گه‌رمتر ده‌بێت و ته‌نانه‌ت له هه‌ندێ ناوچه‌ش پله‌كانی گه‌رما ده‌گاته 50 پله‌ی سیلیزی.
ئاراس جه‌بار شاره‌زای كه‌شناسی ڕایگه‌یاند: بەگوێرەی ئەو گۆڕانکارییانەی کە ھەیە، پێشبینی دەکرێت مانگی داھاتوو بەراورد بەم مانگە پلەکانی گەرما لە ھەرێمی کوردستان و ناوچەکەدا زیاتر بەرزببنەوە و كه‌شوهه‌وا گەرمتر بێت.
ڕاشیگه‌یاند: ھەر لە سەرەتای مانگی داھاتوودا ئەگەر ھەیە شەپۆلی بە ھێزی گەرما ناوچەکە بگرێتەوە کە تیایدا لە ناوچەکانی سنووری گەرمیان پلەی گەرمی بۆ 50 پلەی سەدی یان زیاتر بەرزبێتەوە.
هه‌روه‌ها ڕایگه‌یاند: تا ئێستا شەپۆلی زۆر بەھێزی گه‌رما کاریگەری لەسەر ناوچەکانمان نەبووە، بەراورد بە ساڵانی ڕابردوو كه‌شوهه‌وا باشتر بووە، ئه‌مه سەرەڕای ئەوەی له جیھاندا پلەکانی گەرما بە رێژەیەکی بەرچاو لە وشکانی و زەریاکاندا بەرزبوونەتەوە بەتایبەت لەم ماوەیەدا لە باکوری رۆژھەڵاتی زەریای ئەتڵەسی و ناوەراست و رۆژئاوای دەریای ناوەراست و بەڕادەیەکی نوێ گەرم بووە کە تۆمارەکانی پێشتری تێپەراندووە.
ئاراس جه‌بار گوتیشی: ئه‌م به‌رزبوونه‌وه‌یه‌ی پله‌ی گه‌رما کاریگەری دەبێت لەسەر وەرزی بارانبارینی ئەمساڵ لە وڵاتانی ناوچەکەدا کە بە گەرمبوونی رووی دەریاکان نزمەپاڵەپەستۆکان زیاتر بەھێز و قوڵ دەبنەوە.
شاره‌زاكه‌ی كه‌شناسی ئاماژه‌ی به‌وه‌ش دا كه ئه‌م كاریگه‌رییانه‌ی كه‌شوهه‌وا له جیهاندا ڕه‌نگه شەپۆلی بەھێز و رووداوەکانی لافاو زیاد بکه‌ن، لەگەڵ زیاتر دووبارەبوونەوەی بارودۆخە توندەکان لە بەرگەھەوادا زیاتر لە ھەر کاتێکی پێشتر.
کۆمێنت (0)
تا ئێستا هیچ کۆمێنتێک نەکراوە.