بانكی ناوەندی عێراق: هەڵمەتی پاڵپشتیكردنی دینار سەركەوتوو بووە

عەمار خەڵەف، جێگری پارێزگاری بانكی ناوەندی عێراق ،سەركەوتنی هەڵمەتی پاڵپشتیكردنی دیناری ڕاگەیاند.
خەلەف بە ئاژانسی هەواڵی عێراقی ڕاگەیاندووە، بانكی ناوەندی لە سەرەتای ئەمساڵەوە بە كۆمەڵێك ڕێكار و ڕێنمایی، پاڵپشتی سەقامگیریی نرخی ئاڵوگۆڕی دراوی كردووە ،كە بریتی بوون لە مامەڵەی بەرفراوان بۆ هاوردەكردنی كەلوپەل و خزمەتگوزارییەكان لە ڕێگەی پلاتفۆرمی ئەلیكترۆنییەوە.
ئاماژەی بەوەشكرد،ئەمە خاڵێكی سەرەكی بوو بۆ ئەوەی زۆرترین ژمارەی بازرگان و ئەو كەسانە بگرێتەوە كە ڕێگەیان پێدراوە دراوی بیانی بەدەستبهێنن.
 ڕوونیشیكردەوە كە خێراكردنی ڕێكارەكان، هۆكارێكی دیكە بووە بۆ باشتركردنی متمانە بە پلاتفۆرمی ئەلیكترۆنی.
ناوبراو لە درێژەی قسەكانیدا گوتی: هیچ كێشەیەك لە دابینكردنی دۆلاردا نییە، بەڵكو لە خواستدایە، بەو پێیەی دابینكردن هەیە و  بانكی ناوەندیش هەوڵدەدات چارەسەری كێشەكان بكات بۆ ئاسانكاری بەدەستهێنانی دراوی بیانی بۆ هاوردەكردنی كاڵاكان و پێشكەشكردنی خزمەتگوزاری بۆ هاوڵاتیان و گەشتیاران بە مەبەستی چارەسەركردن لە نەخۆشخانەكانی دەرەوەی وڵات.
ئەوەشی خستەڕوو، هەڵمەتی پاڵپشتیكردنی دینار سەركەوتوو بووە، ئەمەش بەڵگەی ئەوەیە كە ئێستا زۆرێك لە كاڵا و خزمەتگوزارییەكان لەبری دۆلار بە دینار نرخیان بۆ دانراوە، بەتایبەتی ئامێرە كارەبایی و ئەلیكترۆنییەكان.
لێدوانەكەی جێگری پارێزگاری بانكی ناوەندی عێراق لەكاتێكدایە كە ئێستاكە نرخی 100 دۆلار ئەمریكی لە عێراقدا گەیشتۆتە نزیكەی 149 هەزار دینار و بەهای دینار لەبەرامبەر دوڵاری ئەمریكیدا نزمبوونەوەی بەخۆیەوە بینیوە.