لە كۆتایی ئەم هەفتەیەدا شەپۆلێكی بەهێزی گەرما ئەوروپا دەگرێتەوە

دەسەڵاتدارانی ئیتاڵیا رایگەیاند: لە كۆتایی ئەم هەفتەیەدا شەپۆلێكی بەهێزی گەرما 16 شاری ئیتاڵیا دەگرێتەوە ،ئەمەش لەكاتێكدا شەپۆلی گەرما لە سەرانسەری ئەوروپادا بڵاوبووەتەوە. 
لەوبارەیەوە زانایانی كەشوهەوا لە ئاژانسی بۆشایی ئاسمانی ئەوروپا دەڵێن: پلەكانی گەرما لە دوورگەكانی سیسیلیا و ساردنیا دەگاتە 48 پلە ،بە پلەی سیلیزی ،بە ئەگەرێكی زۆرەوە گەرمترین پلەی گەرمایە كە تا ئێستا لە ئەوروپا تۆماركرابێت، لە ڕۆما-ش دەگاتە 44 پلە، بە پلەی سیلیزی .
هەروەها ئاژانسی بۆشایی ئاسمانی ئەوروپا هۆشداری داوە لەوەی شەپۆلی گەرما لە ئەوروپا تازە دەستی پێكردووە، پێشبینیش دەكرێت ئیسپانیا، فەرەنسا، ئەڵمانیا و پۆڵەندا كەشوهەوایەكی سەختیان هەبێت.
ئەوروپا تاكە شوێن نییە كە ڕووبەڕووی پلەی گەرمی زۆر دەبێتەوە، پێشبینی دەكرێت لە كۆتایی ئەم هەفتەیەدا شەپۆلێكی گەرمای مەترسیدار كە چەند هەفتەیەك دەخایەنێت، بەشێك لە ڕۆژئاوای ئەمریكا بگرێتەوە و هۆشداریش دراوەتە زیاتر لە 90 ملیۆن كەس.