سەرۆک بارزانی بەمزووانە نوێترین کتێبی بەرگی شەشەمی بارزانی و بزووتنەوەی ڕزگاریخوازی كورد بە ناونیشانی (كوردستان و عێراقی نوێ، 2003-2016) دەکەوێتەبەر دەستی خوێنەران.
بەمزووانە چاپی یەكەمی نوێترین كتێبی سەرۆک مەسعود بارزانی، (بەرگی شەشەمی بارزانی و بزووتنەوەی ڕزگاریخوازی كورد) لەژێر ناونیشانی (كوردستان و عێراقی نوێ، 2003-2016) بە زمانی كوردی دەكەوێتەبەر دەستی خوێنەرانەوە.
كتێبە تازەكەی سەرۆک بارزانی لە 1234 لاپەڕە و دوو بەرگ پێكهاتووە و باسی قۆناغێكی هەرە گرنگی مێژووی نوێی كوردستان و پێشهاتەكانی مێژوویەكی سێزدە ساڵە دەكات و لە چواردە بەشی جیا پێک دێت. لەم كتێبەدا ئاماژە بە بارودۆخی كوردستان و عێراق لەو ماوە گرنگە دەكات و بەوردی باس لەو زنجیرە ڕووداو و بەسەرهاتانە دەكات كە ژیانی سیاسیی هەرێمی كوردستان و عێراقی بردووەتە قۆناغێكی تازە. شەڕی ڕزگاریی عێراق و ڕووخانی ڕژێم و دەستپێكی ڕۆڵی كوردستان لە عێراقی تازە و قۆناغی مەجلسی حوكم و قۆناغی ئینتیقالی و نووسینەوەی دەستووری تازەی عێراق و هەروەها هەڵبژاردنەكانی عێراق و ململانێیەكانی ناو پڕۆسەی سیاسیی عێراق و هەورەها پێشێلكاریی دەستوور و دەیان ڕووداوی گرنگی تری عێراق لەو كتێبەدا باس كراوە. سەرۆك بارزانی بەوردی باسی پڕۆسەی سیاسیی هەرێمی كوردستان و دامەزراندنی سەرۆكایەتیی هەرێم و پەیوەندییەکانی هەرێمی کوردستان و وڵاتان و هەڵبژاردنەكان و ڕووداوە گرنگەكانی تری هەرێمی كوردستان لەو ساڵانە دەكات. دوایین بەشی كتێبەكە تازەكەی سەرۆک بارزانی، باسكردنی شەڕی داعش و قارەمانێتیی پێشمەرگە و بەرگریی گەلی كوردستانە لەبەرانبەر پەلاماری تیرۆریستانی داعش هەتا ئۆپەراسیۆنی ئازادكردنی موسڵ.
كتێبی بەرگی شەشەمی بزووتنەوەی ڕزگاریخوازی كورد 94 بەڵگەنامەی گرنگی مێژوویی و سیاسیی وەخۆهەڵگرتووە كە پەیوەستن بە ڕووداوە سیاسیەكانی عێراق و هەرێمی كوردستان لەنێوان ساڵانی 2003 هەتا 2016. كتێبەكە دەوڵەمەندە بە ژمارەیەكی زۆر وێنەی مێژوویی و هەروەها نەخشەی شەڕەكانی هێزی پێشمەرگەی كوردستان لەدژی تیرۆریستانی داعش.
كتێبی (بەرگی شەشەمی بارزانی و بزووتنەوەی ڕزگاریخوازی كورد) لەژێر ناونیشانی (كوردستان و عێراقی نوێ، 2003-2016) لە نووسینی سەرۆک مەسعود بارزانی سەرچاوەیەكی گرنگی زانیاریە بۆ خوێنەران و توێژەران و مێژووناسان و ڕۆژنامەنووسان و سەرجەم چینوتوێژەكانی كوردستان و عێراق.
کۆمێنت (0)
تا ئێستا هیچ کۆمێنتێک نەکراوە.