پۆلیسی سلێمانی تۆمەتبارێکی دەستگیر کردووە کە بە فێڵ 10 ملیۆن دیناری لە کچێک سەندووە و دواتر ڕایکردووە.
ئەمڕۆ دووشەممە 12ـی 06ـی 2023 مەفرەزەکانی نووسینگەی بەکرەجۆی بەشی پۆلیسی نەھێشتنی تاوانی سلێمانی دەستگیرکردنی تۆمەتبارێکی ڕاگەیاند، لەمبارەیەوە بەڕێوەبەرایەتیی پۆلیسی سلێمانی ڕاگەیەنراوێکی بڵاو کردەوە و ڕایگەیاند: دوای تۆمارکردنی سکاڵایەکی یاسایی لەلایەن باوکی کچێکەوە کە کەسێک بە فێڵ بڕی 10 ملیۆن دیناری لە کچەکەی سەندووە و دواتر پارەکەی بردووە و بۆ شوێنێکی نادیار ھەڵاتووە، دەستبەجێ ھێزەکانی پۆلیس لێکۆڵینەوەکانیان بۆ دۆزینەوە و دەستگیرکردنی تۆمەتبار دەستپێکرد.
ڕاشیگەیاند: لە لێکۆڵینەوەکانی پۆلیسدا دەرکەوت کە تۆمەتبار بۆ شاری کەرکووک ھەڵاتووە، دواتر ھێزەکانی پۆلیس زانیارییان لەسەر شوێنی تۆمەتبار کۆکردەوە کە گەڕاوەتەوە بۆ شاری سلێمانی، سەرئەنجام و پاش وەرگرتنی بڕیاری دادوەر، توانرا تۆمەتبار لەلایەن مەفرەزەکانی نوسینگەی بەکرەجۆی بەشی پۆلیسی نەھێشتنی تاوانەوە لەشاری سلێمانی دەستگیربکرێت.
پۆلیسی سلێمانی ئاشکرای کردووە کە ناوی تۆمەتبار (ئـ. عـ. حـ) لەدایکبووی 2001ـە و دانی بە تاوانەکەیدا ناوە و ئێستا بە بڕیاری دادوەر و بەپێی ماددەی 443 لە یاسای سزادان ڕاگیراوە و لێکۆڵینەوەکان بەردەوامن.
کۆمێنت (0)
تا ئێستا هیچ کۆمێنتێک نەکراوە.