وەزارەتی کارەبا لەبارەی دەنگۆی بەرزبوونەوەی نرخی کارەبا ڕوونکردنەوە دەدات

وەزارەتی کارەبای هەرێمی کوردستان ڕایگەیاند، دەنگۆی بەرزبوونەوەی نرخی کارەبا هەر کیلۆواتێکی کارەبا لە 18 دینارەوە بۆ 156 دینار دوورە لە ڕاستییەوە.

وەزارەتی کارەبای هەرێمی کوردستان ڕایگەیاند: دەنگۆی بەرزبوونەوەی نرخی کارەبا هەر کیلۆواتێکی کارەبا لە 18 دینارەوە بۆ 156 دینار دوورە لە ڕاستییەوە و کرێی کارەبا بۆ هاووڵاتیان لە هەموو شوێنێک بە بازاڕ و سیتییە ئاساییەکانیشەوە هەمان نرخی جارانە و وەک خۆیەتی.

ڕاشیگەیاند: وەزارەتی کارەبا تەنیا بۆ سیتییە گرانبەهاکانی بە سیستەمی پریپەید، کە کارەبایەکی 24 کاتژمێرییان هەیە و موەلیدەی ئەهلییان نییە، بڕیاری داوە هەر کیلۆواتێکی کارەبا بە 156 دینار ئەژمار بکرێت.

وەزارەتی کارەبا ئەوەشی خستەڕوو کە سیستەمی پریپەید تەنیا بۆ زیاترکردنی کاتەکانی پێدانی کارەبا و چارەسەرکردنی گرفتی قەرزی کارەبایە، کە بەهۆیەوە پێدانی کرێی کارەبا دەبێتە پێشوەختە.

باسی لەوەش کردووە کە  ژێرخانی بەرهەمهێنانی کارەبای هەرێمی کوردستان گەیشتووەتە نزیکەی (7400) مێگاوات، بەڵام بەهۆی کێشەی سووتەمەنی و نەختینەوە، ئێستا کەمتر کە (4200) مێگاوات بەرهەم دێت، سیستەمی پریپەید بەشێکی زۆری ئەم کێشەیە چارەسەر دەکات و بەرەو دابینکردنی كارەبایەكی باشتر بۆ هاووڵاتیان هەنگاو دەنێین.

وەزارەتی کارەبا ئاماژەی بەوەش داوە کە پڕۆسەی سیستەمی پریپەید ماوەی ساڵێكە دەستیپێکردووە و تاوەکو ئێستا لە سیتییەکانی گوندی ئیتاڵیی یەك و فیوچەر ستی و پارک ڤیو و جیهان ستی و گوندی لوبنانی و دریم سیتی و نازناز سیتی و كواترۆ تاوەر و ڕۆیا تاوەر و بازاڕی لەنگە لە هەولێر و بازاڕی دهۆک و ئەڤرۆ سیتی و بازاڕی عەلوەی سلێمانی بەسەرکەوتوویی جێبەجێ کراوە.